६ नम्बर प्रदेशय् एमाले–माओवादी विवाद

येँ – एमाले व माओवादी दथुइ पार्टी एकता जुइ न्ह्यः प्रदेशसभाया सिट समेत भागबन्डा जुइ माःगु चर्चा जुयाच्वंगु हे इलय् प्रदेश नम्बर ६ या मुख्यमन्त्री सुयात बीगु धइगु खँय् कडा मतभेद ब्वलंगु दु । म्हिगः च्वंगु प्रदेश ६ या एमाले संसदीय दलया बैठकं थ्व प्रदेशया ४० सिट मध्ये बछि थःपिंसं त्याकागु जूगुलिं थन थःपिं हे मुख्यमन्त्री जुइमाः धइगु दावी न्ह्यःने तःगु दु ।

माओवादीं धाःसा रोल्पा, रुकुम थेंज्याःगु माओवादीया आधार क्षेत्र समेत लानाच्वंगु व मेथाय् स्वयां थन हे थःपिनि सिट ल्याः नं अप्वः दुगु जुयाः थ्व प्रदेशय् थःपिं हे मुख्यमन्त्री जुइ दयेमाः धकाः दावी यानाच्वंगु दु । प्रदेशय् च्वंपिं निगुलिं पार्टीया स्थानीय नेतातय्सं मुख्यमन्त्री मत्वःतेगु संकेत बीवं पार्टी एकताय् समेत विलम्ब वयाच्वंगु खँ धाःगु दु । माओवादीं निगू प्रदेशय् मुख्यमन्त्री दावी यानाच्वंगु दु ।

थ्वहे झ्वलय् थ्वहे वइगु माघ २४ गते जुइगु राष्ट्रिय सभाया चुनावय् एमाले व माओवादी तालमेल यानाः न्ह्याः वनेगु खँ क्वःजिउगु दुसा उकी उम्मेदवार ल्ययेगु ज्या धाःसा जुइ मफुनि । वाम तालमेल यात धाःसा त्यायेफुगु ४३ सिट मध्ये माओवादीया १४ सिटय् उम्मेदवारी बीगु भाग लाःगु दु । माओवादीं थ्व उम्मेदवार ल्ययेगु जिम्मा पार्टी अध्यक्ष पुष्पकमल दाहाल लिसें वरिष्ठ नेतात नारायणकाजी श्रेष्ठ व रामबहादुर थापा बादलयात बिउगु दु ।

वय्कःपिंसं थौं तकया दुने उम्मेदवार ल्यइगु खँ दु । एमालें २९ सिटय् उम्मेदवारी बीत्यंगु दु ।उखे राष्ट्रिय सभाया चुनावय् नेपाली कांग्रेसं राजपा व संसफोलिसे तालमेल यानाः न्ह्याः वनेगु प्रस्ताव तःगु दुसा उकियात राजपां स्वीकार याःगु दु । राजपां प्रदेश २ पाखें राष्ट्रियसभाय् न्याम्ह सांसद थःपिंत बीमाः धइगु माग न्ह्यःने तःगु दु । संसफों सिटया ल्याः धाःगु मदुनि । राष्ट्रिय सभाया लागिं कन्हय् उम्मेदवारी दर्ता यायेमाःगु कार्यसूची दु ।