जनजाति प्रतिष्ठान माः कि म्वाः ?
येँ (नेपालभाषा टाइम्स)÷प्रतिनिधिसभाया महिला तथा सामाजिक समितिं आदिवासी जनजाति आयोग संवैधानिक रुपय् स्थापना जुइधुंकूगु अवस्थाय् आः आदिवासी जनजाति उत्थान राष्ट्रिय प्रतिष्ठान आवश्यक जू कि मजू धकाः सरकारयात न्ह्यसः तःगु दु । समितिया म्हिगः च्वंगु बैठकं उगु प्रतिष्ठानया आवश्यकता आः दनि लाकि मन्त धइगु बारे अध्ययन यानाः लिसः बीत सरकारयात निर्देशन बिउगु दु ।
समितिया सभापति निरुदेवी पालं आयोग व आदिवासी जनजाति उत्थान राष्ट्रिय प्रतिष्ठानया ज्या यायेगु प्रकृति छगू हे खः धासें थज्याःगु दोहोरो संरचना राज्यया नितिं माः लाकि म्वाः धकाः न्ह्यसः तयादीगु खः ।
उकथं हे समितिं आदिवासी, जनजाति उत्थानया नितिं नीतिगत व कार्यगत क्षेत्रय् योगदान जुइ कथं उमिगु भाषा, कला, संस्कृति व परम्पराया माःगु अध्ययन, अनुसन्धान व अभिलेखीकरण यायेत आदिवासी जनजाति आयोगयात निर्देशन नं बिउगु दु ।
समितिं बिउगु निर्देशनय् धयातःगु दु, ‘आदिवासी, जनजातिया भाषा, कला, संस्कृति, संस्कार लिसें परम्परा, रहनसहनया निरन्तर अभ्यासं उमिगु पहिचान ल्यंकातःगु दु ला ?
झीगु थ्व विविधता राज्यया सांस्कृतिक सम्पत्ति जूगु व नागरिकया सामुदायिक पहिचानया विषयवस्तु नं जूगुलिं उकिया संरक्षण, प्रवद्र्धन, सञ्चार व कीर्ति रक्षाया नितिं माःगु अध्ययन, अनुसन्धान व अभिलेखीकरण यायेत व उकियात माःगु नीतिगत कथं कार्य सम्पादन यायेत आदिवासी जनजाति आयोगयात निर्देश यानाच्वना ।’
समितिया निर्देशन लिपा आदिवासी जनजाति आयोगया अध्यक्ष रामबहादुर थापामगरं आयोगं थःगु जिम्मेवारीपूर्वक सम्पादन यायेगु प्रतिबद्धता प्वंकादीगु खः । वय्कलं संवैधानिक आयोग व उकिया पदाधिकारीपिं क्वःछिनातःगु मापदण्ड पूवंकाः वःगुलिं उमिसं थःगु जिम्मेवारी पूवंकेगुली विश्वस्त जुइत समितियात इनाप यानादीगु खः ।
LEAVE YOUR COMMENTS