यलया धार्मिक सम्पदा पुनःनिर्माण याइगु

यल (नेपालभाषा टाइम्स) – यल महानगरपालिकां थीथी थासय् च्वंगु धार्मिक महत्वया सम्पदा पुनःनिर्माण याइगु जूगु दु । यल मनपां मंगलबजारय् च्वंगु नृसिंह व देगु तलेजु, बालकुमारीइ च्वंगु बालकुमारि देगः, लगंख्यलय् च्वंगु न्हूपुखूया पुनःनिर्माण यायेत्यंगु खः ।

यल मनपाया प्रमुख चिरिबाबु महर्जनं थुपिं दक्वं सम्पदा यल मनपाया १०२ क्वःगु स्थापना दिवसया दिंकुन्हु पुनःनिर्माण यायेगु जानकारी बियादीगु दु । वय्कःयाकथं बालकुमारी देगः पुनःनिर्माणया निंतिं आवश्यक विस्तृत परियोजना प्रतिवेदन (डीपीआर) तयार यायेगु ज्या जुयाच्वंगु दुसा लगंख्यःया न्हूपुखूया निंतिं छगूत्या करोड बजेट नं विनियोजन यायेगु ज्या जुइधुंकूगु दु ।

यल मनपां धार्मिक सम्पदा बाहेकं सार्वजनिक महत्वया लागाय् नं निर्माणया ज्यायात तीव्रता बिया वयाच्वंगु दु । यल मनपां लः व हरियालीजन्य परियोजना अन्तर्गत जावलाख्यलय् न्यागू थासय् उद्यान निर्माण यानाच्वंगु दुसा लगंख्यः व कुमारिपाटीइ नं उद्यान निर्माण यायेगु तयारी जुयाच्वंगु दु ।

थुकथं हे यल महानगरया सुन्दरता अप्वयेकाः स्मार्ट सिटी दयेकेगु ल्याखं स्मार्ट मत जडान, साइकल लेन, हरियाली प्रवद्र्धनया निंतिं आवश्यक तत्वया निंतिं थापाथलीस्थित बागमति तांनिसें सातदोबाटोतक स्मार्ट सतक मत तयेगु ज्या लिपांगु चरणय् थ्यंगु नगर प्रमुख महर्जनया धापू दु । महानरवासीयात कर व नक्सा पासलिसें मेमेगु सेवा सुविधाया निंतिं अनलाइन प्रविधिपाखें सुविधा बीगु व्यवस्था नं यल मनपां यायेत्यंगु दु ।

थ्व झ्वलय् यल मनपा दुनेया ७९ द्वः खा छेँयात ब्लब नं. तयेगु निंतिं जुयाच्वंगु अध्ययन नं क्वचायेधुंकूगु दु ।

सम्बन्धित बुखँ

LEAVE YOUR COMMENTS