सीमित दुजःपिं च्वनाः मतयाः क्वचायेकल

यल (नेपालभाषा टाइम्स) – दँय्दसं गुलांगा दुतियाकुन्हु न्यायेकीगु परम्परागत मतयाः थुगुसी गुरुजु, ग्वसाः खलः, पाःलाः सीमित दुजःपिं जक च्वनाः न्यायेकेगु ज्या जुल । विश्वय् महामारीया रुपय् न्यना वनाच्वंगु कोरोना भाइरस (कोभिड-१९)या संक्रमणया कारणं ब्वलंगु विषम परिस्थितियात ध्यानय् तयाः सामाजिक दूरी कायम यासें सीमित दुजःपिं जक च्वनाः मतयाः क्वचायेकूगु खः ।

मतयाःलिसें गुंलाथ्व पारुनिसंहे ब्वगी वनेगु, मतयाः, बुंग वनेगु, स्वयम्भू वनेगु व गुंलागा पंचमिकुन्हु न्यायेकेमाःगु गणेश पुजानापं पाःब्व लःल्हायेगु, गुरुपिंत सिरपाः लःल्हायेगु लगायत परम्परांनिसें न्ह्याना वयाच्वंगु सकतां ज्याझ्वः थुगुसी कोरोना संक्रमणया जोखिमयात ध्यानय् तयाः सामाजिक दूरी कायम यानाः क्वचायेकेगु ज्या जूगु न्यकू जात्रा मतयाः व्यवस्था केन्द्रीय समितिं जानकारी बिउगु दु ।

कोरोनाया कारणं विषम परिस्थितियात ध्यानय् तयाः थुगुसी दुजः, खलःया सीमित ल्याखय् जक च्वनाः यलया प्यंगः थूर, बहाःबही, यल नगरया मू मू चीभाः चैत्य जक कयाः थुगुसीया मतयाः क्वचायेकूगु खः ।

थ्व हे झ्वलय् आकिवं मतयाः जात्रा पर्व संचालनया निंतिं पाःब्व लःल्हायेगु ज्या नं क्वचाःगु दु। थुगुसीया पाःलाः त्वाः क्षेत्र नं ७ न्यकू जात्रा मतयाः संचालन समिति ओकुबहाःपाखें आकिवं पाः काइगु क्षेत्र नं ८ न्यकू जात्रा मतयाः संचालन समिति इखालखुयात पाःब्व लःल्हाःगु खः ।

श्री रुद्रवर्ण महाविहार, ओकुबहालय् जूगु ज्याझ्वलय् केन्द्रीय समितिपाखें सिरपाः नं लःल्हाःगु खः । ज्याझ्वलय् समितिया नायः आशारत्न शाक्यया सभापतित्वय् वय्कलं हे लसकुस यासें न्ह्याःगु ज्याझ्वलय् क्षेत्र नं. ७या मू गुरु बेखारत्न शाक्य, सहगुरु सानुरत्न शाक्य, न्यकू गुरु राजु शाक्य, दम्वःखिं गुरु शान्तमानन्द शाक्य, ब्वगि गुरु हेराकाजी शाक्पिंत मोति सिरपाः व कुलरत्न बसी सिरपाः नं लःल्हाःगु खः । वय्कःपिंत सिरपाःकथं झिद्वः व न्याद्वः तका दां समितिया नायः शाक्य, दातापिं श्रजेस शिल्पकार व तारणबहादुर शाक्यं लःल्हानादीगु खः ।

ज्याझ्वलय् बागमति प्रदेशसभाया दुजःपिं ज्ञानेन्द्र शाक्य, शोभा शाक्य, यल महानगरपालिका वडा नं. ६ या वडाअध्यक्ष हित्लर शाक्य, १६ वडाअध्यक्ष निर्मलरत्न शाक्य, १९ वडाअध्यक्ष विनोद ताम्राकार, मतयाः संचालन समिति क्षेत्र नं. ७ या नायः जानी शाक्य, क्षेत्र नं. ८या नायः प्रविण श्रेष्ठ लगायतं मतयाः जात्राया महत्वयात कयाः नुगःखँ प्वंकादीगु खः ।

वि.सं. २०६१ सालय् नकबही क्षेत्रया पाःलाःगु इलय् कफ्र्युया कारणं निक्वः यानाः मतयाः न्यायेकूगु खःसा २०७२ सालय् भुखाय् ब्वःगु इलय् प्यंगः थूर, बहाःबही, व मू चैत्य जक कयाः सम्पन्न याःगु खः ।