ने. सं. ११४६ बछलागा तृतीया -

नेपाः-भारत सिमाना खुल्ला याये मजिउ धइगु हानं छक्वः पुष्टि जुल : परराष्ट्रविद् श्रेष्ठ

येँ – वरिष्ठ परराष्ट्रविद् भाजु हिरण्यलाल श्रेष्ठं हलिन्यंकं महामारी जुयाः न्यना वनाच्वंगु कोरोना संक्रमणया थ्व अवस्थां यानाः नेपाः-भारत सिमाना खुल्ला याये मजिउ धइगु खँ हानं छक्वः पुष्टि जूगु खँ कनादीगु दु ।

‘नेपालभाषा टाइम्स’ लिसे खँ ल्हासें वयकलं धयादिल, ‘नेपाः-भारत सिमाना खुल्ला याये मजिउ धकाः झीसं न्हापांनिसें धया वयाच्वनागु खः । वास्तवय् थ्व खुल्ला सिमानां यानाः झीत छु गज्याःगु समस्या वयेफु धइगु खँ कोरोना संक्रमणं यानाः पुष्टि याना बिल ।’

‘नेपालय् थःपिंसं कोरोना पिकाःगु मदु, थ्व ला भारतया लँ जुयाः दुहां वयाच्वंगु कारणं यानाः नं नेपाः–सिमाना बन्द हे यायेमाः धइगु खँ ला सिद्ध जुल नि’ वय्कलं धयादिल ।

थौंकन्हय् चीन व अमेरिकाया दथुइ कोरानाया खँयात कयाः पिहां वःगु विवादं कोरोना विरुद्धया लडाइँयात कमजोर याना बी फइगु बिचाः नं वयकलं तयादिल । ‘थ्व इलय् ला चीन व अमेरिका जानाः कोरोनाया भ्याक्सिन पत्ता लगे यायेगु ज्या धकाःसा यायेमाः, अज्याःगु ज्या मयासे उपिं ल्वानाच्वंगु विश्वया लागिं हे ग्यानापुगु खँ खः,’ भाजु श्रेष्ठं कनादिल ।

कोरोना रोकथामया लागिं सरकारं लागू याःगु लकडाउन बांलाःगु ज्या खःसां थुकिं यानाः मर्काय् लाःपिं निम्न वर्गया मजदूरतयत गामय् लिहां वने मबीगु व शहरय् नयेगु मबीगु यानातःगु धाःसा पायछि मजूगु बिचाः नं वयकलं तयादिल ।

‘शहरय् च्वनेगु अवस्था मदुपिंत छेँय् लिहां वनेगु व्यवस्था यायेमाः’, वयकलं धयादिल, ‘सरकारं माःगु व्यवस्था याये मफुगुलिं मनूत सयौं किलोमिटर ला न्यासि वनाः पार यानाच्वन, थ्व गलत जुल ।’

गरिबतय्त थःगु गामय् लिहां वनेगु अवसर मबिउसां गुलिखे धनीमानी मनूत धाःसा सरकारी गाडी हे छ्यलाः वये-वने यानाच्वंगु द्वपं नं वयकलं बियादिल । थ्वहे अवस्था जुयाच्वन धाःसा मनूत कोरोना ल्वचं मसीसां भुखमरीं कयाः सी फुगु ख्याच्वः नं वयकलं बियादिल ।

कोरोनाया कारणं देशय् स्थानीय सरकारयात अझ बल्लाकेमाःगु आवश्यकता अझ महसुस याकूगु खँ नं वय्कलं कनादिल । ‘नागरिकयात त्वाः त्वालय् वनाः स्वापू तयेगु व व्यक्ति व्यक्तिलिसे ज्या यायेमाःगु जुयाः थज्याःगु ज्या स्थानीय सरकारं जक याये फइ’ वयकलं धयादिल ।

कोरोनायात पनेत विश्वन्यंकं लकडाउन जुयाच्वंगु दुसा आः थुकिया भ्याक्सिन पत्ता यानाः जक पूरा खुल्ला याये मालीगु बिचाः नं भाजु श्रेष्ठं तयादिल ।

थ्व अवधि तक मनूतय्सं छेँय् छेँय् च्वनाः सिर्जनशील ज्या यासें लकडाउनया उपयोग यायेमाःगु बिचाः नं भाजु श्रेष्ठं तयादिल तयादिल । थगुने तिनि ज्याःजंक्व क्वचाःम्ह भाजु श्रेष्ठं थ्वहे कोरोना लकडाउन इलय् हे नेपाल-बंगलादेश सम्बन्धया करिब २५० पेज दुगु सफू च्वये सिधयेकादीगु दु ।