विषालु ब्यांचात

कोलम्बियाया बगोटाया एल डोराडो अन्तर्राष्ट्रिय विमानस्थलय् चेकिङ यानाच्वंगु इलय् प्रहरी अधिकृतयात छगः ब्यागया क्वय्या ब्व भचा अजीव कथंया ताल । एक्स रे मेसिनं नं ब्यागय् तयाहःगु कापया दथुइ हाकुगु रंगया छुं वस्तु खनेदत । ब्याग चायेकाः स्वःबलय् उकी फोटो कायेगु फिल्म (रिल)या बट्टा खनेदत, तर बट्टा चायेका स्वःबलय् उकी रिल छतिं मदु। उकी दुने ला तस्कर यायेगु निंति लोप जुइत्यंपिं ब्यांचिया छगू प्रजाति तयातःगु जुयाच्वन ।

ब्यांचिया तस्करी धयागु खँ न्यनेबलय् अजू चाइ, छाय्धाःसा झीथाय् ब्याँचा न्ह्याथाय् नं याउँक खनेदु। थज्याःपिं ब्यांचा तस्कर यानाः छु दइ धयाथें जुइ । तर थ्व तस्कर यानाहःगु ब्यांचा सामान्य ब्यांचा मखु, थ्व ब्यांचा छम्हेसिया हे तस्करी बजारय् निद्वः डलर (२ लाख ४० हजार तका) तू । तस्कर यानाहःगु ब्यांचात गुलिं हाकुगु, म्हासुगु ध्वःध्वः दुपिं, गुलिं ब्यांचा चमकदार सन्तरासि रंगया दु। थुपिं ब्यांचा स्वयेबलय् गुलि आकर्षक खनेदु, उलि हे ग्यानापुक विषालु नं खः । कोलम्बियाया प्रहरीया कथं थ्व प्रजातिया ब्यांचा कोलम्बियाया प्रशान्त क्षेत्र कोको व भ्यालि डेल कोका क्षेत्रं लाना हयाः जर्मनी यंकेत्यंगु खः ।

कोलम्बिया ब्यांचिया यक्व विविधता दुगु संसारया निगूगु देय् खः । थन दइम्ह पोइजन डार्ट ब्यांचा धर्ती दुपिं तसकं विषालु जीवत मध्ये छगू खः । युरोप व अमेरिकाया संग्रहकर्तातय् थज्याःपिं ब्यांचायात लहिनातय् शौक दु, उकिं हे थुपिं ब्यांचिया तस्करी जुइगु खः ।

थ्व छम्ह ब्यांचिया म्हय् थुलि विष दइकि उकिं झिम्ह मनूतय्त याउँक हे स्यनाबीफु। थुपिं ब्यांचात थःगु रंगया कारणं तसकं आकर्षक जुइ, तर थ्व हे आकर्षण उमिगु प्रजातिया निंतिं खतरा जुयाच्वंगु दु। थ्व हे आकर्षण कारणं तस्करतय्सं थज्याःपिं ब्यांचात तस्कर याना वयाच्वंगु दु। जर्मनीया हम्बोल्ट इन्ष्टिच्यूटया शोधकर्तातय्सं याःगु छगू अध्ययन कथं कोलम्बियाय् २०० प्रजातिया उभयचर लोप जुइगु अवस्थाय् दु, उकी मध्ये अप्वः धयाथें ब्यांचात हे लानाच्वंगु दु ।

थथे ब्यांचात लोप जुया वनीगु खतरा अप्वया वःगुलिं कोलम्बियाय् हे थज्याःपिं ब्यांचिया वैध प्रजनन ज्या सुरु जूगु दु। टेसोरोस डि कोलम्बिया नांया थ्व प्रजनन केन्द्र लोप जुइत्यंपिं ब्यांचिया वैध प्रजनन यानाः संग्रहकर्तातय्त मिइगु याइ । थथे मीबलय् अवैध रुपं तस्कर यानाहःगु ब्यांचिया स्वयां तसकं दंगु भावं न्याये दइ ।

टेसोरोसया संस्थापक इवान लोजानो कोलम्बियाय् ताःहाकःगु कानुनी प्रक्रिया पूवंकेधुंकाः वैध रुपं प्रजनन यानाः ब्यांचा मीगु सुरु याःगु खः । लोजानं थौंकन्हय् न्हय्गू प्रजातिया ब्यांचिया प्रजनन यानाः अमेरिका, युरोप व एशियाय् निर्यात यानाच्वंगु दु । संग्रहकर्तातय् दथुइ दकलय् अप्वः कोलम्बियाया ओफगा नांया ब्यांचिया माग दु। थ्व ब्यांचां अनिषेचित ख्येँ नयेगु याइ । लोजानोया कथं दकलय् खतराय् दुगु ब्यांचिया प्रजाति थ्व हे खः ।

लोप जुइत्यंपिं ब्यांचिया प्रजनन याना वयाच्वंगुलिं लोजान अमेरिका, युरोपया संग्रहकर्तातय् दथुइ लोकंह्वाः । उकिं न्हापां दँय् स्वीम्हति ओफगा ब्यांचा बुइका वयाच्वंम्ह लोजानं थौंकन्हय् दँय् १५० म्ह तक ब्यांचा प्रजनन याना वयाच्वंगु दु ।