अलिखित इतिहासया बाखं ‘न्हयेका सिँ’ : सुशील राजोपाध्याय
किपू नगरपालिकाया ग्वसालय् नकतिनि क्वचाः नेपालभाषा चिहा संकिपा कासा नकतिनि क्वचाल । थुगु चिहा संकिपा कासाय् डेल्टा मल्टिमिडिया प्रोडक्सनया न्ह्यब्वया ‘साःगः’ न्हाप, नेवाः युट्युबया न्ह्यब्वया ‘आजुद्यः’ ल्यू, शशीकला मानन्धरया न्ह्यब्वयाः ‘लाखेपाः’ लियांल्यू व फोकस पिक्चर्सया न्ह्यब्वया ‘न्हयेका सिँ’यात हःपाः सिरपाः लात । चिहा संकिपा ‘न्हेकासिँ’या च्वमि सुशील राजोपाध्याय लिसे उदेन न्हूसाय्मिं सिरपाः त्याकूगु चिहा संकिपायात कयाः यानादीगु खँल्हाबल्हा :
न्हयेका सिँ सत्य घटना वा किम्वदन्तिइ छुकी आधारित चीहाः संकिपा खः ?
न्हयेका सिँ किम्वदन्तिइ आधारित संकिपा खः ।
संकिपा आधुनिक वा परम्परागत गुगु बाखनय् आधारित खः ?
थ्व संकिपा आधुनिक परिवेशपाखें न्ह्याःवंगु दु। अले व हे परिवेशपाखें पुलांगु न्यनेकने बाखंयात स्वाना थौंयागु अवस्थाय् तक थ्यंकाः पूवनाच्वंगु दु ।
संकिपां छुं नं सन्देश बियाच्वंगु दइ । थ्व संकिपां छु गज्याःगु सन्देश बीत स्वःगु दु?
छुं नं खँयात सतहीरुपं जक स्वल धाःसा द्वनी । उकिया लिउने किनाच्वंगु अर्थयात नं बिचाः यायेमा । यदि बिचाः याये मफुत धाःसा ल्हातय् लायेधुंकूगु उपलब्धि नं छखे लायेयः धयागु सन्देश थ्व संकिपां बियाच्वंगु दु ।
संकिपां किपू व किपूमियात गुलितक प्रभावित यायेत सफल जूगु तायेकादिया ?
न्हयेका सिँ संकिपाया बिषयवस्तु मुक्कं किपूयागु खः । थ्व संकिपा किपूमितय्सं छ्यलाबुलाय् हयाच्वंगु भाजंगाः दिपया बारे खः । भाजंगाः दिपया बारे अझं मसिउनिपिं यक्व दइतिनि । अज्याःगु खँ सकल संकिपा स्वकुमिपिनिपाखें प्रचार प्रसार जूगु दु धइगु जिं तायेका । थुकिं यानाः किपू व किपूमिपिंत स्वयेगु दृष्टि हे पाइ । थ्व खँ किपूमिपिनिगु निंति बांलाःगु पक्ष खः ।
संकिपां किपूया ऐतिहासिक पक्षयात पिब्वयेत गुलितक सफल जू थें च्वं ?
खय्तला थ्व संकिपाया पृष्ठभूमि हे किपूया भाजंगाः दिपया खः, किम्वदन्तिया खः । दिपय् सी उइगु संस्कारया बिषयया खः । थजाःगु संस्कार गबलेनिसें न्ह्यात धयागु बारे छुं नं अभिलेख गनं नं च्वयातःगु मदु। उकिं थ्व छगू अलिखित इतिहास नं खः । अले अनुसन्धानया बिषय नं खः ।
संकिपाय् मगाः मचाः छुं दु ला ?
थ्व संकिपाया आलेख जिं ज्यानागु खः । जिं यानागु अध्ययनया लिधंसाय् आलेख ज्यानागु जुल । अध्ययन याये मगाःगु नं खयेफु। अथे खःसा मगाःमचाः नं दयेफु। अले थुकी दुम्ह छम्ह पात्रया भूमिका नं जिं निर्वाह यानागु दु। थुकी नं मगाःमचाः दयेफु। स्वकुमिपिसं स्वयाः कुलादी धयागु भलसा कया ।
LEAVE YOUR COMMENTS