ने. सं. ११४४ कछलागा द्वादशी -

चैनपुरया लाखे धेंधेंबल्लाः

ने.सं. ११४० कछलागा द्वादशी, त्रियोदशी व चःह्रे अर्थात २०७६ मंसिर ७, ८ व ९ गते चैनपुर समाज सेवा युवा क्लब व नेवाः देय् दबू चैनपुर नगर समिति जानाः प्रदेश नं. १ ब्यापी लाखे प्याखं धेंधेंबल्लाः कासा यात । प्रदेश नं. १ धायेबलय् सोलुखुम्बु, संखुवासभा, ओखलढुंगा, तेह्रथुम, खोटाब, भोजपुर, सुनसरी, धनकुटा, ताप्लेजुब, मोरब, झापा, इलाम व पाँचथर यानाः झिंप्यंगू जिल्ला लाः । प्रदेश नं. १ या जिल्लात पहाडी क्षेत्रय् लाःगुलिं वये–वने यायेत हे थाकुगु जुयाः झिंप्यंगू जिल्ला जूसां न्हय्गू जिल्लां
जक ब्वति काःगु खः ।

संखुवासभा जिल्लाया चैनपुर समाज सेवा युवा क्लब नेवाःत जक दुगु क्लब खः । नेपाल वाणिज्य बैंकया प्रमुख कार्यकारी अधिकृत भाजु किरण जोशीया कथं चैनपुरय् २५० खा छेँ दु। उकी २२५ खा छेँ नेवाःतय्गु खःसा २५ खा छेँ जक मेपिनिगु दु। ख नं खः चैनपुर बजार पूरा नेवाःतय्गु बस्ति, प्रदूषणं मुक्त, लँय् धू धयागु खने हे मदु। तसकं सफा । नेवाःतय् पहःकथं सुथय् थःगु छेँय् वसिबँ पुइबलय् थःथःगु छेँ न्ह्यःने न्ह्यःने नं बँ पुइगु जूगुलिं नगरपालिकाया मनूत वयाः बँ पूवइ धू काः वइ धकाः पिया नं च्वनेम्वाः ।
बजारय् नितँ निसें स्वतं जक जाःगु छेँ स्वात्तुस्वानाः दनातःगु जूगुलिं थःथःपिंस. बँ पुल धायेवं थू थःहे सुचुकुचु जुइगु जुल । चैनपुरया करुवा धाल कि न्हापांनिसें हे नांजाः । छेँ छगू हे कथं मिले जुइक दनातःगुलिं अति हे बांलाः ।

मंसिर ७ गते अर्थात कछलागा द्वादशीकुन्हु चैनपुर बजार छगुलिं लाखे प्रतियोगिताय् ब्वति काःझाःपिं लाखे प्याखंया आयोजकपिं नापनापं प्रतिनिधि सभा, प्रदेश सभाया सांसदपिं, नगर प्रमुखनिसें स्थानीयवासीपिं जानाः लाखेया जुलुसय् ब्वति कायेगु ज्या जुल । उगु जुलुसय् ब्वति काःझाःपिं सकसितं शहर छगुलिं झलमल यानाः ध्वाँय् ब्वयेकेगुया नापनापं छेँखापतिं सिजः घलय् स्वां तयाः लसकुस यानातल । चैनपुरया तिंख्यलय् सकसितं लसकुस यात । उगु ज्याझ्वः ताःलाकेत रंजन श्रेष्ठया अध्यक्षताय् छगू मूल समारोह समिति व वयां लिपा थीथी उपसमिति गठन यानातःगु दु ।

थीथी ज्या थीथी उपसमिति स्वनाः जूगुलिं ज्याझ्वः सुथांलाक्क हे न्ह्यात । सम्मान यायेगु ज्याझ्वलय् आयोजकपिनिगु चैनपुर लाखे प्याखं नं क्यनेगु ज्या जुल । आयोजक पुचःपाखें धेंधेंबल्लाः कासाय् ब्वति मकासे सहभागी जक जूगु खः । प्यंगू पुचः लाखेयात सिरपाःया व्यवस्था यानातःगुलिइ न्हाप लाःम्हेसित ५५,५५५।– तका, लिउयात ३३,३३३।– तका व लियांलिउयात २२,२२२।– व हःपाः कथं ११,१११।– तका दांया व्यवस्था यानातःगु खः । ब्वति काःपिंत प्रमाणपत्र व पुरस्कार लाःपिंत दां व प्रमाणपत्र निगुलिं बिउगु खः ।

प्रदेश नं. १य् लाखे धेंधेंबल्लाः कासाय् ब्वति काःपिं –
१) झीगु पुचः, गाइघाट, उदयपुर
२) नेवाः थ्व सुन्दर हरैचा, मोरङ्ग
३) तुम्लिङ्गतार लाखे समाज, संखुवासभा
४) वाना लाखे समिति समाज, संखुवासभा
५) नेपालभाषा मंकाः खलः, वोखिम भोजपुर
६) नेपाल खड्गी सेवा समिति, धनकुटा
७) पासा खलः, धरान, सुनसरी
८) अमृत तीनधारा लाखे समाज, टक्सार भोजपुर
९) झीगु परोपकार समाज, म्याबलुब, तेह्रथुम
१०) सिवुवा लाखे समाज, पाँचखपन

संखुवासभा
११) खाँडवारी युवा समाज, संखुवासभा
१२) खराब लाखे समाज, संखुवासभा
१३) देउराली लाखे समूह, चैनपुर संखुवासभा

लाखे धेंधेंबल्लाः कासाया लागि स्वम्हेसिगु छगू निर्णायक समिति गठन याःगु खः । उकी संयोजक कथं प्रा. डा. चुन्दा वज्राचार्य व सदस्य एकाराम सिंहपिंत येँनं सःतूगु खःसा विश्वनाथ कर्माचार्य स्थानीय व्यक्तित्व खः । स्वम्हेसित स्वथाय् तयाः लाखे प्याखं मूल्यांकन याके बियाः न्हाप, लिउ, लियांलिउ व हःपाः घोषणा याःगु खः ।

लाखे प्याखनय् झ्यालि, धोलक निसें ड्रम तकं थायेगु याःगु खः । प्याखनय् मंगलकथं सुकुन्दा च्याकाः ज्या न्ह्याकूगु खः । प्याखं ल्हुइपिं मुख्य लाखे जूसां नापनापं कृष्ण थें ज्याःपिं देवगण राक्षसगण, पशुपंक्षीगण नं दुथ्याकूगु खःसा बाजं थाइपिं व सगं ज्वना वइपिं सकसिनं ज्वरा हे नेवाः वसः पुनाः भव्यता जायेकेगु जूगु खः । लाखे प्याखं थीथी तालय् प्रदर्शन जूगु खः ।

लाखे प्याखनय् छम्ह जक लाखे प्याखं हुइकेगुली नेपाली खड्गी सेवा समिति धनकुटा दुसा धरानया लाखे प्याखनय् येँय् थें लाखे व झ्यालिंचा संलग्न दु। लाखे प्याखनय् झ्यालिंचा संलग्न म्हो हे जक, द हे दःसां झ्यालिंचा व लाखे समन्वय दइगु म्हो हे जक खनेदु। लाखे प्याखनय् लाखे निम्ह ज्वःछिं लाखे प्याखं हुइकेगु चलन आपालं लाखेप्याखनय् खनेदुसा लाखेयात कृष्ण वा इन्द्र थेंज्याःपिं लाखेयात वध यानाः देवगणया विजय क्यनेगु नं जूगु खः । लाखे प्याखनय् गुगुं लाखे रक्षक वा द्यःया रुपय् कयातयेगु जूसा गुगुं लाखे प्याखनय् लाखे भक्षक कथं नं कायेगु यानातःगु खनेदु। लाखे प्याखनय् पात्र छम्ह निसें १०–१२ म्ह तक दुगु जक मखु बाजं खलः, वन्दना खलः यानाः २०–२५ म्हति नं समावेश जुयाच्वंगु दु। आयोजकपिंसं आर्थिक दृष्टिकोणं ११ म्ह व्यक्ति बाजंखलः, वन्दना खलः व प्याखं ल्हुइपिं पात्र यानाः तयातःगु खःसां म्हो हे जक प्याखं खलकं आयोजकपिनिगु ल्याःयात ध्यानय् तयातःगु दु ।

ख्वपया लुसि वा कथि ल्वाकेगु प्याखं गुगु प्याखंयात ख्वपय्तय्सं हनुमान प्याखनं लाखे ल्हुइकेगु जूसा गुगु प्याखं लाखे प्याखंया मू प्याखं नाप स्वापू दुसा गुगु प्याखं लाखे प्याखंनाप स्वापू मदुगु दु। लाखे प्याखंया प्याखंम्वःतय्गु भेषभुषा थःथःगु गां–त्वाः, थाय्बाय् कथं हे जूगु दु। लाखेया छ्यनय् गंगा जमुना अर्थात हाकुगु च्वाम्वः व तुयुगु च्वाम्वलं छाय्पा तयेगु जूसा आपालं लाखे प्याखं लाकां मन्ह्यासे हुलेगु याःसां स्पोर्टसुज न्ह्यानाः नं लाखे झ्यालिंचा प्याखं हुइगु याः । न्ह्यागु हे जूसां थःथःगु थाय्या मौलिकता
कथं थःगु हे पहलं लाखे प्याखंया प्रस्तुति जुल । गुगुं लाखे द्यः (रक्षक) कथं प्रस्तुत जुलसा गुगुं लाखे समाजयात दुःखबीपिं कथं प्रस्तुत जुल । लाखे रक्षक वा भक्षक न्ह्यागु हे जूसां प्याखंया सन्देश शान्त व दुःखं मुक्त यायेगु जुल । लाखे प्याखं थथे हे जुइमाः धयागु मदु। थःगु थाय्बाय्या गज्याःगु परम्परा खः, व हे ल्यंकाः समाज न्ह्याकायंकेगु खः ।

पाहाँपिंत स्वांमाःया नापं रुद्राक्षमाः क्वखायेकेगु व वानेश्वर महादेव व सत्यदेवीया जवगु मिखा कुतुंवंगु पीठ सिद्धकालीया दर्शन याकेगु नं चैनपुरवासीपिनिगु परम्परा जुयाच्वन ।