चैत्र ४ गते असनय् द्यः ल्वाकीगु

येँ – थुगुसी पाहांचः¥हे जात्रा थ्वहे वइगु चैत्र २ गते न्यायेकीगु जूगु दु । पात्रोय् १ गते पाहांचः¥हे धयातःसां थीथी अजिमापिनि खः जात्रा व द्यः ल्वाकेगु जात्रा धाःसा २ गतेनिसें शुरु यायेगु सहमति जूगु दु । थनया तेबहाः भद्रकाली, वटु भद्रकाली कंग अजिमा स्वखःया दथुइ तेबहालय् जूगु मुँज्यां चैत्र २ गते द्यः गमय् तयेगु व चैत्र ३ गते बहनी १० बजे तिंख्यलय् द्यः ल्वाकेगु निर्णय याःगु दु । अथे हे चैत्र ४ गते न्हिनय् २ बजे असनय् द्यः ल्वाकेगु निर्णय जूगु खँ तेबहाः गुथिया नायः तुतुभाइ महर्जनं कनादिल । थुगुसी द्यः जात्राय् आवश्यक शान्ति सुरक्षा व ट्राफिक व्यवस्थापन यायेत २२ वडाया अध्यक्ष चिनिकाजी महर्जनया संयोजनय् जात्रा चाःहिलीगु १३ गू वडाया अध्यक्ष व प्रहरी, स्थानीय क्लबतय् मुँज्या नं च्वंगु दु ।

जनबहाःद्यः जात्राया समिति ः मेखे जनबहाः द्यःया जात्रा न्यायेकेगु निंतिं जात्रा व्यवस्थापन समिति नीस्वंगु दु । जनबहाः द्यःया गुरुजु लिसें २५ वडा अध्यक्ष निलकाजी शाक्ययात कजि कथं ल्ययाः उगु समित स्वंगु खः । अथेहे येँ मनपाया मेयर विद्यासुन्दर शाक्य, येँ जिल्ला प्रशासन कार्यालय प्रमुख केदारनाथ शर्मा व जात्राया रुटय् लाःगु वडाया वडाध्यक्षपिंत व्यवस्थापन समितिया संरक्षक कथं ल्यःगु दु ।