राजदूत डा. शाक्य डिप्लोम्याट अफ द इयर अवार्डपाखें सम्मानित

येँ (नेपालभाषा टाइम्स) – इजरायलया निंतिं नेपाःया राजदूत डा. अन्जान शाक्य ‘डिप्लोम्याट अफ द इयर-२०२०’ पाखें सम्मानित जुयादीगु दु । ‘द एम्बेस्डर्स क्लब अफ इजरायलं’ राजदूत शाक्ययात उगु अवार्डपाखें सम्मान याःगु खः ।

अवार्डया घोषणा वंगु छुं ई न्ह्यव हे घोषणा यानातःगु खःसां नं विश्वव्यापी कोरोना महामारीया कारणं अवार्ड वितरण यायेगु ज्या लिज्यानाच्वंगु खः । द एम्बेस्डर्स क्लब अफ इजरायलं हालय् जक छगू ज्याझ्वःयासें वय्कःयात उगु अवार्डपाखें सम्मान याःगु खः । इजरायलया प्रतिष्ठित संस्था द एम्बेस्डर्स क्लब अफ इजरायलया अध्यक्ष राजदूत यितजाक एल्डन व इजरायली परराष्ट्र मन्त्रालयया शिष्टाचार विभागया प्रमुख राजदूत गिल हास्केलं मंकाःकथं राजदूत डा. शाक्ययात उगु अवार्ड लःल्हानादीगु खः ।

इजरायलया निंतिं नेपाःया राजदूत डा. शाक्य इजरायल वःगु छुं ईया दुने हे नेपाःयात इजरायलय् ‘भिजिबल’ दयेकेत सफल जूगु धासें वर्ष राजदूत अवार्डपाखें सम्मान यानागु संस्थां न्ह्यथंगु दु । अवार्ड लःल्हायेगु ज्याझ्वलय् इजरायली परराष्ट्र मन्त्रालय शिष्टाचार विभागया प्रमुख राजदूत हास्केल, मन्त्रालयया हे एशिया प्रशान्त डिभिजन उपप्रमुख राजदूत माइकल रोनेन, एशिया प्रशान्त क्षेत्रीय समूहया राजदूतपिनि डीन इजरायलया निंतिं म्यानमारया राजदूत माउब माउब लिन, क्लबया उपाध्यक्ष, बोर्ड उपाध्यक्ष, प्रमुख कार्यकारी अधिकृत लगायतया व्यक्तित्वपिनिगु उपस्थिति दुगु खः ।

ज्याझ्वलय् परराष्ट्र मन्त्रालयया एशिया प्रशान्त डिभिजनया उपप्रमुख राजदूत रोनेनं इजरायली परराष्ट्र मन्त्री गाबी आस्केनाजीया व नेपाली राजदूतावासया द्वितीय सचिव अर्जुन घिमिरें नेपाःया परराष्ट्र मन्त्री प्रदीपकुमार ज्ञवालीया भिंतुना सन्देश ब्वनाः न्यंकादीगु खः । नेपाःया निंतिं इजरायली राजदूत हानान गोदरं नं भिंतुना सन्देश ब्वनाः न्यंकादीगु ज्याझ्वलय् इजरायलया निंतिं थाइ राजदूत पन्नाभा चन्द्राराम्या, इजरायलया नांजाःम्ह म्येँ हालामि गाली अतारी, इजरायली आर्किटेक्ट इन्जिनियर डा. अदा गान्साच व इजरायलय् विद्यावारिधी यानाच्वनादीम्ह नेपाःमि सविता देशेमरु भिडियो सन्देश बियादीगु खः ।

अवार्डपाखें सम्मानित जुयादीम्ह राजदूत डा. शाक्यं द एम्बेस्डर्स क्लब अफ इजरायलया सकल पदाधिकारी लगायत थःत थःथःगु थासं थीथीकथं ग्वाहालि यानादीपिं सकसितं सुभाय् देछानादिसें अवार्ड थःगु निंतिं जक मखसे सकल नेपाःमिया निंतिं हे गौरवया विषय जूगु व वइगु दिनय् नेपाः व इजरायलया सम्बन्ध अझ क्वातुका यंकेत उतिकं हे मेहनत याना वनेगु विचाः प्वंकादीगु खः ।

ज्याझ्वलय् राजदूत डा. शाक्यं हिब्रु भासं नेपाः सम्बन्धी लोकंह्वाःगु म्येँ तकं न्ह्यब्वयादीगु खः ।