ग्वाय् दुम्ह यः

नायक सैफ अली खान व वया न्हापायाम्ह कलाः अमृता सिंह पाखें दुम्ह म्ह्याय् सारा अली खान थ्व इलय् थःगु निगूगु संकिपा ‘सिंबा’या प्रमोशनय् व्यस्त जुयाच्वंगु दु । प्रमोशनया हे झ्वलय् सारायात वयागु मतिनाया बारे खँल्हाबल्हा याःगु दु । खँल्हाबल्हाया झ्वलय् गज्याःम्ह मिजंनाप ‘डेटिंग’ य् वने न्ह्याः ? डेटिंगय् वने न्ह्यः मिजंयाके छु दयेमाः थें च्वं ? धइगु न्ह्यसःया लिसलय् सारां न्हापां ला थम्हं डेटया बारे आतक छुं नं विचाः मयानागु धाःगु खः ।

लिसें अज्याःगु छुं खास विशेषता दयेमाः धकाः धलः नं मदयेकानिगु धाःम्ह सारां लिपा भचा विचाः याये धुंकाः छगू तःहाकःगु हे धलः सार्वजनिक यानाबिल । सारां धाःगु दु, ‘जिगु सामाजिक संजालय् छगू गोप्य अकाउन्ट दु, गुकिया माध्यमं जिं हट ब्वाइजया बारे ध्यान बियाच्वनागु दु, छुं छुं मनूतय् फोटो यल धाःसा व हे सिक्रेट एकान्टपाखें लाइक नं याना ।

आतक सुं मिजं नाप अफेयर जूगु धइगु चर्चा मजूनिम्ह सारां अज्याःगु परिस्थितिया सामना नं यायेमाःगु अवस्था वःगु मदु । डेटय् वनीम्ह मिजंयाके खास छु छु दयेमाः धइगु धलः मदयेकूसां भचा ख्याः यायेमाःम्ह, ह्युमर गाक्कं दुम्ह जुइमाः धाःम्ह सारां थौंकन्हय् थःत ग्वाय् लहिनातःपिं तसकं हे यः धकाः धाःगु दु । ‘जितः थौंकन्हय् ग्वाय् दुपिं मिजंत तसकं यः, उकिं विशेष यानाः डेटिंगय् वनीम्ह मिजं ग्वाय् दुम्ह जूसा जिउ’, सारां धाःगु दु ।