खःमेय् जात्रा सुथन्हापनं याइगु, कोटय् बली मबीगु

ख्वप (नेपालभाषा टाइम्स) – विश्वब्यापी महामारी कथं न्यनाच्वंगु नोबल कोरोना भाइरसया प्रभाव स्वनिगः दुने झन् झन् अप्वः जुयावनेवं ख्वपय् थुगुसी मोहनिया झ्वलय् जुइगु थीथी जात्रा पर्व नं क्वपालेज्या जूगु दु । मेयर सुनिल प्रजापतिं जात्रालिसें सम्वन्धित थीथी पक्षलिसे बारम्बार सहलह यानाः जात्रा क्वपालेगु ज्या यानादीगु खः ।

थ्व झ्वलय् नांजाःगु खःमेय् ब्वाकेगु जात्रा नं प्रभावित जूगु दु। मोहनिया नवमिकुन्हु सनिलय् नवदुर्गा द्यःछेँय् तयातःम्ह खःमेय्यात ह्याउँक सिन्हः पाकाः अय्लाः, थ्वँ त्वंकाः जात्रा यानाः ब्रम्हायणी कुण्डय् लखं छ्वाकेगु व पीठय् यंकाः बली बीगु चलन दु। तर महामारीयात ध्यानय् तयाः छुं नं कथंया जात्रा मयायेत धयाच्वंगु ख्वप नगरपालिकां थ्व ज्यायात चान्हय् (सुथ न्हापां) सञ्चालन याके बीगु जूगु दु। नवदुर्गा द्यः गणपाखें प्राप्त जानकारी कथं अष्टमिकुन्हु चान्हय् हे तयारी अवस्थाय् तयाः नवमिकुन्हु सुथ जुइ न्ह्यव तुं खःमेय्यात सीमित मनूत जक च्वनाः ब्रम्हायणी पीठय् यंकाः ब्वये यंकीगु जूगु दु ।

नवदुर्गा गणं मोहनि फयेगु व द्यःया सृष्टि जुइगु थाय् ब्रम्हायणी पीठय् यंकाः उम्ह खःमेय्यात स्यायेगु चलन दु । वयागु कँलाय्यात तकं सातिकुन्हु सुथय् चाभारां कयेकाः गिजे यायेगु जात्रा जुइ । दशमिकुन्हु न्हिच्छिं ब्रम्हायणी लाइम्ह उम्ह द्यःयात बासा लायेकाः ख्वप देसय् दुत हयाः भेल्पा ल्वहँतय् स्वां क्वकायेवं मोहनि क्वचाइ । वयां लिपा नवदुर्गायात तलेजुइ बिज्याकाः अनं पिहां वयेवं पायः जात्रा न्ह्याकाः ख्वपय् मोहनिया सकतां ज्याझ्वः क्वचायेकीगु चलन दु ।

थ्व झ्वलय् तलेजुइ कोटय् थुगुसी कोथमेय् बली मबिइकीगु जूगु दु। शक्ति पीठय् नं कोरोना भाइरसया कारणं सिं धंकाः खिपः चिनाः बन्द यानातःगु दु । स्वां वायेगु, बाजं थायेगु व मत कलाँली यंकेगु चलन नं बन्द जूगु दु ।

सम्बन्धित बुखँ

LEAVE YOUR COMMENTS