लानिपुखू व देगः उलेज्या
राष्ट्रपति, प्रधानमन्त्रीपाखें थीथी तीर्थया लः लानिपुखुली प्वंकल
येँ (नेपालभाषा टाइम्स) – लानिपुखुली पुनःनिर्माण याःगु बालगोपालेश्वर देगःया प्राणप्रतिस्था यायेगु लिसें लानिपुखूया उलेज्या जूगु दु। म्हिगः छगू ज्याझ्वःया दथुइ राष्ट्रपति विद्यादेवी भण्डारीं उलेज्या यानादीगु खः । ज्याझ्वलय् न्ववानादिसें लानिपुखू, खुलामञ्च व तिंख्यः दुथ्याकाः राष्ट्रिय पुनःनिर्माण प्राधिकरणं दयेकूगु बृहत्तर गुरुयोजना कार्यान्वयन जुइमाःगु खः धयादीगु खः ।
प्राधिकरणं लानिपुखू पुननिर्माणया निंतिं २८ करोड खर्च तूगु खँ धाःगु दु । लानिपुखू व देगः पुनःनिर्माण प्यदँ व गुला व स्वन्हु दुने क्वचाःगु खँ प्राधिकरणया प्रमुख कार्यकारी अधिकृत सुशील ज्ञवालीं कनादीगु दु । येँ महानगरपालिकाया निर्णय कथं बालगोपालेश्वर देगः ग्रन्थकुट शैलीं पुनःनिर्माण याःगु खः । न्हापा थ्व देगः गुम्बज शैलीं दयेकातःगु खः । २०७२ सालया तःभुखाचं लानिपुखू व देगलय् क्षति जुइवं पुनर्निर्माण ज्या न्ह्याकूगु खः ।
थ्व झ्वलय् देगः गुकथं दयेकूगु धयागु विवाद जुइवं महानगरपालिकां छगू अध्ययन कमिटी हे दयेकूगु खः । कमिटीं मल्लकालय् थ्व देगः ग्रन्थकुट शैली दुगु धकाः बिउगु प्रतिवेदन कथं देगःयात ग्रन्थकुट शैलीं हे दयेकूगु खः । पुखू उलेज्याझ्वलय् थीथी तीर्थस्थलं हःगु जल पुखुली तःगु खः । स्वसः व ५२ दँ न्ह्यः लानिपुखू (न्हूपुखू) दयेकूगु इलय् नेपाः, भारत लिसें थीथी थासं १०८ गू कुण्ड, ताल व पुखुली जल हयाः प्वंकेहःगु खँ इतिहासय् न्ह्यथनातःगु दु ।
उलेज्याझ्वलय् प्रधानमन्त्री केपी ओली, उपप्रधानमन्त्री ईश्वर पोखरेल, मन्त्रीत, येँ महानगरपालिकाया मेयर विद्यासुन्दर शाक्य, उपमेयर हरिप्रभा खड्गी श्रेष्ठपिनि उपस्थिति दुगु खः । लानिपुखू उलेज्याया लिसें राष्ट्रपति भण्डारीं दरबार हाइस्कूलया नं उलेज्या यानादीगु खः । भुखाचं क्षति जूगु दरवार हाइस्कूल चिनियाँ सरकार ८७ करोड तकाया ग्वाहालिं पुनर्निर्माण याःगु खः ।
स्कूल उलेज्याझ्वलय् केन्द्रीय आयोजना कार्यान्वयन एकाइ (शिक्षा)या आयोजना निर्दे शक रामशरण सापकोटां येँ महानगरपालिकाया मेयर शाक्ययात स्कूलया ताःचाः लःल्हानादीगु खः । ज्याझ्वलय् न्ववानादिसें मेयर शाक्यं थ्व स्कूलयात शैक्षिक गुणस्तरया ल्याखं नं नमूना स्कूल दयेकेगु प्रतिबद्धता प्वंकादीगु खः ।
LEAVE YOUR COMMENTS