स्वनिगःया सतकय् च्याद्वः मत

येँ – देय्या राजधानी येँयात सुन्दर व व्यवस्थित यायेगु अभियानय् लगे जुयाच्वंगु येँ महानगरपालिकां सतकय् मत जडान यायेगु अभियान न्ह्याकीगु जूगु दु । येँ महानगरपालिकां बहनिसिया इलय् नं नगर दुनेया दक्वं सतक झःझः धायेकेगु ल्याखं सतक मत जडान यायेगु अभियान न्ह्याकूगु खः ।

उकिया निंतिं येँ महानगरपालिकां दक्वं सतकय् करिब च्याद्वःया ल्याखय् सतक मत जडान याइगु जूगु दु । येँ मनपां बहनिसिया इलय् नं महानगर दुनेया दक्वं सतक झःझः धायेकेगु उद्देश्यं उकथं सतक मत जडान यायेगु अभियान न्ह्याकूगु खः । येँ मनपां स्वीनिगुलिं वडाया तथ्यांक संकलन यानाः सतकय् विद्युतीय मत जडान यायेगु अभियान न्ह्याकूगु खः ।

महानगरपालिकां दक्वं सतकय् मत जडान यानाः बहनिसिया इलय् नं महानगरयात झःझः धायेकेगु ल्याखं चालु आर्थिक दँया नीति तथा कार्यक्रम मार्फत ‘मेयर उज्यालो कार्यक्रम’ अन्तर्गत न्यागू करोड तका बजेट विनियोजन याःगु खः ।

थुगु अभियान अन्तर्गत महानगर लागाया दक्वं मुख्य मुख्य सतक, चुक, गल्ली आदि थासय् मत जडान यायेगु मनपाया योजना खःसा थुकी दकलय् न्हापां धार्मिक, सांस्कृतिक व व्यावसायिक क्षेत्रयात न्हापांगु प्राथमिकता बियातःगु दु ।

मत जडानया निंतिं थाय् व आवश्यकता स्वयाः म्होतिं २४ निसें अप्वलय् ५० वाट तकया मत जडान यायेगु मनपाया योजना दु । येँ मनपा थम्हं विनियोजन याःगु बजेट बाहेकं दक्वं वडां नं थःपिंत विनियोजन याःगु बजेटय् म्होतिं नं १० प्रतिशत सतक मत जडानया निंतिं खर्च यायेमालीगु जुइ ।

 

सम्बन्धित बुखँ

LEAVE YOUR COMMENTS