ने. सं. ११४३ चौलाथ्व तृतीया -

कुलमानया थासय् शाक्य वइगु सम्भावना

येँ (नेपालभाषा टाइम्स) – नेपाल विद्युत प्राधिकरणया कार्यकारी निर्देशकय् कुलमान घिसिङयात हाकनं नियुक्ति यायेमाःगु माग यासें म्हिगः थनया फिब्व ख्यलय् प्रदर्शन जुल । तर पुचः पुचः मुनाः अन वनाच्वंपिं मनूतय्त प्रहरीं लःया फोहोरां छ्वाकाः लिना छ्वत । वयां लिपा प्रदर्शनकारीतय्सं कुचा कुचा यानाः जुलुस पिकासें थीथी लागा चाःहिउगु खः ।

वंगु भदौ २९ गते घिसिङया कार्यकाल क्वचाःगु दुसा वय् कःयात प्राधिकरणपाखें विदाई नं यायेधुंकूगु दु। अथे खःसां घिसिङयात हाकनं नियुक्त यायेमाः धकाः सामाजिक सञ्जालय् नं व्यापक माग जुया वःगु दु। सरकारं घिसिङयात निरन्तरता मबीवं स्वस्फूर्त रुपं मनूत सतकय् कुहां वःगु खः । घिसिङयात निरन्तरता बीमाः धासें म्हिगः बौद्ध लागाय् नं प्रदर्शन जूगु खः । देय्यात लोडसेडिब मुक्त यानाः घाटाय् वनाच्वंगु प्राधिकरणयात लबः नयेगु अवस्थाय् थ्यंकूम्ह घिसिङया लोकप्रियता अप्वया वनाच्वंगु दु ।

थ्वहे झ्वलय् मेखे कुलमान घिसिङया थासय् नियुक्त जुइगु लागिं नं प्राधिकरण दुने व्यापक रुपं दौडधुप शुरु जूगु दु। थ्व दौडय् दकलय् न्ह्यःने अन हे कार्यरत वरिष्ठ इन्जिनीयर हितेन्द्रदेव शाक्यया नां वयाच्वंगु दु। तर शाक्ययात बदनाम यायेगु लागिं छुं मनूतय्सं वय्कःयात प्रधानमन्त्री केपी ओलीया ससःकिजा धकाः नं च्वयेगु याना हःगु दु। केपी ओलीया जहान नं शाक्य जूगु कारणं सार्वजनिक पदय् सुं शाक्य वयेवं हे वयात प्रधानमन्त्रीया ससःकिजा धकाः हिस्यायेगु ज्या छथ्वःसिनं यानाच्वंगु दु।

हितेन्द्रदेव शाक्य प्रमया जहानलिसे छुं हे कथंया स्वापू मदुम्ह स्वतन्त्र इन्जिनीयर खः । प्राधिकरण सूत्रं धाःकथं स्वनिगलय् लोडशेडिङ क्वपालेगु लागिं कुलमान घिसिङयात लिउने च्वनाः पूर्ण रुपं ग्वाहालि यानाच्वंम्ह व्यक्तित्व हितेन्द्र शाक्य हे खः । तर वय्कः सार्वजनिक धाःसा जुयामदी ।