मच्छेनारां द्यःया मेला नं स्थगित

येँ (नेपालभाषा टाइम्स) – वइगु असोज २ गतेनिसें मनमास शुरु जू वनाच्वंगु दु। पुरुषोत्तम मास व अधिकमास नं धाइगु मनमासया इलय् छुं नं कथंया धार्मिक गतिविधि जुइमखु। पूजापाठ, द्यःया जात्रा, धलं दनेगु दक्वं गतिविधि लछितक जुइमखु ।

थ्व इलय् येँया दक्षिण भेगय् लाःगु मछेगामय् च्वंगु मच्छेनारां द्यःया जक पुजा यायेगु व मेला जुइ । तर थुगुसी धाःसा मच्छेनारां द्यःया मेला नं मजुइगु जूगु दु। चन्द्रागिरि नगरपालिका वडा नं. ९ अन्तर्गत मछेगामय् च्वंम्ह मच्छेनारां द्यःयाथाय् मनमासया इलय् स्नाान मेला जुइगु खःसा थुगुसी कोरोना भाइरस संक्रमण व महामारीया कारणं स्थगन याःगु दु ।

लिपांगु इलय् स्वनिगलय् न्हियान्हिथं कोरोना संक्रमितया ल्याः अप्वया वनाच्वंगु, संक्रमणपाखें बचे जुइत रोकथाम व नियन्त्रणया निंतिं निषेधाज्ञा जारी यानातःगु कारणं मच्छेनारां द्यःयाथाय् जुइगु जात्रा स्थगन यानागु नगरप्रमुख घनश्याम गिरीं कनादीगु दु। मनमासया इलय् मेमेगु धार्मिक क्षेत्रय् छुं हे गतिविधि मजुइगु व मच्छेनारां द्यःयाथाय् स्वनिगः न्यंकंया थीथी थासं द्वलंद्वः द्यः दर्शन यायेत वयेगु याः । कोरोना संक्रमणया जोखिमयात ध्यानय् तयाः थुगुसी मेमेगु जात्रा पर्व थें मच्छेनारां द्यःया मेला नं स्थगित यानागु नगरप्रमुख गिरी कनादीगु दु ।

विश्वन्यंकं महामारीया रुप कया वनाच्वंगु कोरोना भाइरस संक्रमणया जोखिमयात ध्यानय् तयाः स्वनिगलय् जनबहाःद्यःया जात्रा, पाहांचःह्रे जात्रा, बिस्काः जात्रा, थिमिया भुइसिन्हः जात्रा, म्ये प्वाः खनेगु जात्रा, द्वाल्खाया बुंगद्यःया जात्रा, ल्हुति पुन्हि, स्वांयाःपुन्हि, गुंपुन्हि थेंज्याःगु नेवाःतय् तःजिगु जात्रा दक्वं स्थगित याःगु खः ।

येँया तःजिगु जात्रा यँयाःपुन्हि क्षमापुजाय् जक सीमित जूगु खःसा बुंगद्यःया जात्रा नं सांकेतिक रुपं जक यानाः भोटोजात्रा, याकः मिसा भुज्याः, नैंक्यालं लुइगु छुं नं मयासे सिधयेकेत्यंगु दु। मनमासया इलय् जक मच्छेनारां द्यःया दर्शनया निंतिं लछिया दुने नीगू लाखं मल्याक धार्मिक पर्यटक वयेगु याः । मच्छेनारां द्यःया मेला स्थगन जूसां लछियंकं जुइगु विशेष आराधना पुजा धाःसा यथावत हे जुइगु नगरपालिकां जानकारी बिउगु दु ।