ज्ञानमाला समितिया पदाधिकारीपिंत लसकुस व भिंतुना देछा
येँ – गण महाविहार गणबहाःपाखें नेपाल राष्ट्रिय ज्ञानमाला समितिया न्हू निर्वाचित पदाधिकारीपिंत लसकुस यासें भिंतुना देछायेगु ज्या जुल ।
महाविहारया प्रमुख भिक्षु शोभित महास्थविरं समितिया न्हूगु ज्यासना पुचःयात भिंतुना बियाबिज्यासें छुं नं ज्या यायेबलय् जोश जाँगरलिसें पलाः पतिकं विचाः यानाः धर्मानुकूल जीवन न्ह्याका वनेत धासें बेहोसी जुयाः मखु, होसय् ज्या सुथां लाके फयेमा धयाबिज्यात । महाविहारया उपासिका इन्द्रकुमारि महर्जनं ज्ञानमालाया महत्वयात थुइकादिसें ज्ञानमाला मात्र भजन जक मखसे थ्व धाथेंया हे ज्ञानया मार्ग खः धयादिल ।
ज्याझ्वलय् विशेष पाहांकथं झायादीम्ह समितिया संरक्षक प्रा. सुवर्ण शाक्यं बुद्ध धर्म सकसिगु निंतिं आवश्यक धर्म खः धासें ज्ञानमाला भजन मेमेगु भजन स्वयां फरक विषय खः धयादिल ।
‘ज्ञानमाला भजनपाखें शीलाचारी जुइगु, आचरण बांलाइगु व बौद्ध शिक्षा बीगु भजन खः’ वय्कलं धयादिल । बौद्ध परियत्ति शिक्षा नियन्त्रक नापं अखिल नेपाल भिक्षु महासंघया कोषाध्यक्ष श्रद्धेय भिक्षु बोधिज्ञान महास्थविरपाखें बुद्धपुजा व पंचशील बियाबिज्याःगु ज्याझ्वलय् सम्मान ग्रहण यासें समितिया नायः रमना श्रेष्ठं थः गण महाविहारय् हे दुहां वयाः बुद्ध धर्मया ख्यलय् पलाः छीगु ह्वःताः चूलाःगु खः धयादिल । ज्याझ्वलय् महाविहारपाखें समितिया न्हूगु ज्यासना पुचःया पदाधिकारी व दुजःपिंत खादां क्वखायेकाः लुमन्तिं चिं लःल्हाःगु खः ।
LEAVE YOUR COMMENTS