अन्तरिक्ष यात्राय् स्पेस एक्स

निम्ह अमेरिकी अन्तरिक्ष यात्री प्यन्हु न्ह्यव पृथ्वीइ लिहां वल । थ्व अन्तर्राष्ट्रिय अन्तरिक्ष केन्द्रय् पाखें पृथ्वीइ लिहांवःगु न्हापांगु व्यापारिक क्रु मिशन खः । डग हर्ले व बब बेहेनकेन नांया निम्ह अन्तरिक्ष यात्री स्पेसएक्स ड्रागन क्याप्सुलपाखें मेक्सिकोया खाडीइ कुहां वःगु खः । उपिं कुहां वःगु गुगु यान खः, व छगू व्यापारी यान खः । अर्बपति व्यापारी एलन मस्कया स्पेस एक्स नांया व्यापारिक कम्पनीया थ्व यानं सुरक्षित रुपं धरतीइ कुहां वयेफुगु धयागु लिपा वनाः अन्तरिक्षय् व्यावसायीक यान पाखें नं मनूतय्त छ्वयेफइ धयागु क्यंगु दु। थ्वयां न्ह्यव न्हापा अन्तरिक्षय् वनीपिं फुक्कं थीथी देय्या सरकारीस्तरं दयेकीगु यान पाखें हे वये वने यानावयाच्वंगु दु ।

थुपिं अन्तरिक्ष यात्रीत निला तकया अन्तरिक्ष अभियान लिपा सुरक्षित रुपं धरतीइ कुहां वःगु खः । व्यावसायिक कम्पनीया यान पाखें हे ज्या कायेफत धाःसा सरकारया अर्बौ डलर बचत जुइगु अनुमान दु। थथे जुल धाःसा बचे जूगु ध्यबां मेमेगु अन्तरिक्ष अभियान न्ह्याकेत बजेट चू लाःवइ, गुकिं यानाः मंगल, ग्रह, चन्द्रमा आदिया अध्ययन यायेफइ ।

ड्रयागन क्याप्सुल वंगु मे महिनाय् अन्तर्राष्ट्रिय अन्तरिक्ष केन्द्रय् छ्वःगु खः । थुकियात फाल्कन ९ रकेटय् तयाः प्रक्षेपण याःगु खः । थ्व अभियानया सफलता लिपा अमेरिकी अन्तरिक्ष अध्ययन केन्द्र नासायात यक्व कथं लबः दइगु खँ धाःगु दु। नासां सन् २०००या दशकय् हे अन्तर्राष्ट्रिय अन्तरिक्ष स्टेशनय् वये वने यायेगु ज्या त्वःतेगु योजना दयेकाच्वंगु खः । सन् २००३ य् कोलम्बिया शटल पृथ्वीय लिहां वःगु इलय् दुर्घटना जुइवं नासां चन्द्रमाय् थ्यंक हे वनेगु स्पेसशीप विकास यायेगुली ध्यान केन्द्रीत यानाच्वंगु खः ।

छु खः स्पेस एक्स
स्पेस एक्स छगू अमेरिकी निजी कम्पनी खः । अर्बपति व्यापारी एलन मस्कं सन् २००२ य् थ्व कम्पनी सुरु याःगु खः । विशेषत मस्कं मंगल ग्रहय् मानव वस्ती विकास यायेगु लिसें अन्तरिक्ष पर्यटन सुरु यायेगु निंतिं थ्व कम्पनी दयेकूगु खः । स्पेस एक्स छगू हे जक थज्याःगु कम्पनी खः गुकिं नियमित रुपं पृथ्वीं अन्तरिक्ष यान प्रक्षेपण यायेगु व लित हयेगु यानाच्वंगु दु। थ्व कम्पनीं अन्तर्राष्ट्रिय अन्तरिक्ष केन्द्रय् नियमित रुपं कार्गो छ्वयेगु यानाच्वंगु दु। थ्व कम्पनी आः स्टारशीप नांया तःधंगु स्पेस क्राफ्ट विकास यानाच्वंगु दु, थुकिया मू ज्या धयागु मंगल ग्रहय् मानव वस्ति तयार यायेत छ्यलेगु जुइ ।