ओलीं स्थायी समिति ‘बहिष्कार’ याइगु

येँ (नेपालभाषा टाइम्स) – नेकपाया अध्यक्ष प्रधानमन्त्री केपी शर्मां आवंलि थम्हं स्थायी कमिटीया बैठकय् ब्वति मकायेगु खँ धयादीगु दु। प्रम ओलीं थः उपस्थित मजुइगु बैठकया वैधानिकता दइ मखु धासें केन्द्रीय कमिटीया बैठक माग याःपिंत नं निराश यानाबिउगु दु ।

ओलीं वंगु असार १० गतेनिसें न्ह्यानाच्वंगु बैठकय् गबलें वयेगु गबलें मवयेगु यानाच्वंगु नं वास्तवय् वय्कःया रणनीति जक जूगु खँ सूत्रं धाःगु दु। ब्वति मकाल धाःसा थःत तप्यंक द्वपं वयेफइगु कारणं वय्कलं बैठक ताःहाकः याना तयेगु योजना दयेकाः हे अथे यानाच्वंगु सूत्रया दावी दु। आः वयाः वय्कलं स्थायी कमिटीया बैठक सःतल धाःसा ‘बहिष्कार’ यायेगु तयारी यानाच्वंगु खँ सूत्रं धाःगु दु ।

वंगु छुं न्हि न्ह्यः जक १५२ जक केन्द्रीय दुजःतय्सं केन्द्रीय कमिटीया बैठक माग यासें निम्ह अध्यक्षयात हस्ताक्षर लःल्हाःगु खःसा प्रम ओलीं केन्द्रीय कमिटीया बैठक च्वनेगु आवश्यक मजू धासें उकियात अस्वीकार यानादीगु खः ।

थ्वहे झ्वलय् नेकपाया प्रवक्ता नारायणकाजी श्रेष्ठं प्रम ओली स्थायी कमिटीया बैठकं बिसिउँ वने मजिउगु खँ धयादीगु दु। पार्टी एकीकरण लिपा अध्यक्ष जुयादीम्ह ओलीं स्थायी कमिटीया बैठक बाइपास याये मजिगु खँ वय्कलं धयादीगु खः । म्हिगः थःगु निर्वाचन क्षेत्र गोरखाय् जूगु छगू भाय् न्ववासें प्रवक्ता श्रेष्ठं धयादिल, ‘पार्टी एकीकरण लिपा न्हापांम्ह अध्यक्ष ओली हे खः, प्रधानमन्त्री नं वय्कः हे खः, अथे जुयाः बैठकय् प्रम ओलीं ब्वति कायेमाः ।’

प्रम ओली विरुद्ध नेकपाया वरिष्ठ नेता माधवकुमार नेपाल, झलनाथ खनाल लिसें आपालं केन्द्रीय दुजःतय्सं असन्तुष्टि प्वंका वयाच्वंगु दुसा उमिसं ओलीयात पार्टीया खँ मन्यनेगु यानाच्वंगु द्वपं नं बियाच्वंगु दु ।

सम्बन्धित बुखँ

LEAVE YOUR COMMENTS