नेकपाया निम्ह अध्यक्ष दथुइ थःथःगु अडान

येँ (नेपालभाषा टाइम्स) – नेपाल कम्युनिष्ट पार्टी (नेकपा) या निम्ह अध्यक्ष दथुइ म्हिगः जूगु वार्ताय् नं सहमति कायम जुइ मफुत । आइतवाःया बैठक सकारात्मक जूगु दाबी याःगु खःसां नं म्हिगः बालुवाटारय् प्रधानमन्त्री केपी शर्मा ओली व नेकपाया अध्यक्ष पुष्पकमल दाहालया दथुइ जूगु वार्ता बिना निष्कर्ष क्वचाःगु खः ।

म्हिगःया बैठकय् प्रम ओलीं फुक्कं विवाद केन्द्रीय सचिवालयं मिले यानाः जक स्थायी कमिटीइ छ्वयेगु प्रस्ताव याःगु खँ सूत्रं धाःगु दु। तर मेम्ह अध्यक्ष दाहाल व नेता झलनाथ खनालं धाःसा सचिवालय बैठक च्वने न्ह्यः हे विवाद क्वःजीमाःगु अडान तःगु खः । दाहाल व खनालं स्थायी कमिटीया बैठक आः स्थगित जूगु अवस्थाय् अन नं ठोस प्रस्ताव यंकेमाःगु खँ धाःगु खः । वयां लिपा छुं हे निर्णय मयासे वार्ता क्वचाःगु खः ।

नेकपा नेता बामदेव गौतम थःगु पक्षय् वयेवं ओलीं थःगु पक्षय् बहुमत खनेदुगु विश्लेषण सहित सचिवालय बैठक जुयाः स्थायी कमिटीइ वनेगु तयारी याःगु खनेदुगु खँ सूत्रं धाःगु दु। तर अध्यक्ष दाहालं धाःसा सचिवालय बैठक न्ह्यः हे शीर्ष तहलय् सहमित जुइमाःगु अडान काःगु खः ।