संघीय गठबन्धनं संविधान च्याकीगु

येँ (नेपालभाषा टाइम्स) – पहिचानवादी राजनीतिक पार्टीतय्गु संगठन ‘पहिचानय् आधारित संघीय गठबन्धनं’ थःपिनि स्थगित जुयाच्वंगु आन्दोलन हानं न्ह्याकीगु जूगु दु। थनया संवाद दबली छगू पत्रकार सम्मेलन यासें गठबन्धनं थ्व घोषणा याःगु खः । गठबन्धनपाखें घोषणा यानातःगु ज्याझ्वः स्वला न्ह्यः कोरोना भाइरसं यानाः स्थगित जूगु खः ।

गुंगू पहिचानवादी पार्टीतय्गु उगु गठबन्धनया छगू घटक नेपाः राष्ट्रिय पार्टीया नायः डा. विजय सैंजुया सभापतित्वय् जूगु पत्रकार सम्मेलनय् देशय् विद्यमान भ्रष्टाचार, महंगी, स्वनिगःया साँस्कृतिक सम्पदा ध्वस्त यायेगु ज्या नापं खोनाय् फाष्टट्राय्क दयेकेगु नामय् स्थानीय मूलवासीतय्गु जग्गा अधिकरण यानाच्वंगु ज्याखँया विरोध याःगु खः ।

गठबन्धनं जारी याःगु न्हूगु ज्याझ्वः कथं आः श्रावण महिनान्यंकं प्रचारात्मक ज्या जुइ । थुकी श्रावण १० गते कैलालीया धनगढी, १७ गते बाँकेया कोहलपुर, २४ गते नवलपरासी, ३१ गते रौतहटय् विरोध कार्यक्रम यायेगु,२४ गते सरकारयात ज्ञापनपौ बीगु, २५ गते थीथी राजनीतिक पार्टीतय्त स्मरणपौ बीगु नापं थीथी कुटनीतिक निकायया पदाधिकारीतय्त नापलानाः आन्दोलन बारे जानकारी यायेगु ज्याझ्वः दु। अथे हे भदौ २ गते मानव अधिकार तथा नागरिक समाजलिसे गोलमेच सम्मेलन यायेगु, ७ गते टिकापुर-थरुहट विद्रोहया लुमंतिइ येँय् विरोध ज्याझ्वः यायेगु, ८ गते हाकुगु न्हि कथं देय्न्यंकं विरोध ज्याझ्वः यायेगु व असोज ३ गते हाकुगु दिं कथं पहिचान विरोधी संविधान च्याकेगु ज्याझ्वः दयेकूगु दु ।

पत्रकार सम्मेलनय् खम्वुवान राष्ट्रिय मोर्चाया नायः आर.के. खम्बु, लिम्वुवानया नायः कुमार लिंग्देन, थरुहटमोर्चाया संयोजक लक्ष्मण थारु, नेपाल लोकतान्त्रिक पार्टीया नायः भानुराम थारु, तराइ मधेस राष्ट्रिय परिषद्या नायः विकास कुमार ठाकुरपिंसं नं नुगःखँ प्वंकादीगु खः ।