एसईई लिच्वः : अप्वः नम्बर बीत स्कूल-स्कूलय् दबाब

येँ – आः स्कूलतय्सं आन्तरिक मूल्यांकन यासें छ्वया बिउगु नम्बरयात हे आधार दयेकाः एसईईया नतिजा सार्वजनिक याइगु जुइवं थः मस्तय्त बांलाःगु नम्बर बी माल धकाः स्कूलतय्त अभिभावकया दबाब वयेगु शुरु जूगु दु । थनया थीथी विद्यालयया सञ्चालकतय्सं धाः कथं अभिभावकतय्थ ज्याःगु दबाबं यानाः एसईईया लिच्वः प्रकाशनय् यक्व चलखेल जुइगु सम्भावना अप्वःगु दु ।

कोरोना संक्रमणया कारणं स्थगित जूगु एसईई परीक्षा आः हानं कायेगु सम्भावना मदयेवं सरकारं स्कूलतय्सं आन्तरिक मूल्यांकनया आधारय्छ्व या हःगु नम्बरयात हे आधार दयेकाः लिच्वः सार्वजनिक यायेगु निर्णय याःगु खः ।

येँया छगू निजी स्कूलया सञ्चालकं नां मकनेगु शर्तय् ‘नेपालभाषा टाइम्स’ यात कनादी कथं स्कूलतय्सं नं थः विद्यार्थीतय्त बांमलाःगु नम्बर बी चाहे मजू, उकिसनं अभिभावकतय्सं नं थः मस्तय्त बांलाक नम्बर बीमाः धकाः दबाब बीगु शुरु याना हःगु दु। वय्कलं कनादी कथं अप्वः धइथें अभिभावकतय्सं थः मस्तय्त ‘ए प्लस’ हे वइ कथं नम्बर बीमाः धकाः ‘इनाप’ याः वयाच्वंगु दु। फुक्क स्कूलतय्सं उकथं हे नम्बर बीगु यात धाःसा थुगुसी ‘ए’ व ‘ए प्लस’ वःपिं विद्यार्थीतय् ल्याः अप्वः दइगु सम्भावना दु ।

आन्तरिक मूल्यांकनया आधारय् मखुसें विद्यार्थीतय्त थःथःगु हे स्कूलय् जाँच बीकाः कापी परीक्षणया ज्या परीक्षा नियन्त्रण बोर्डयात बिउगु जूसा बांलाइगु राय वय्कलं तयादिल । तर अथे मयासे स्कूलं हे नम्बर छ्वयेगु धाःगुलिं आः स्कूल-स्कूलय् अभिभावकतय् दबाब वयाच्वंगु खँ वय्कलं कनादिल । वय्कलं धयादिल, ‘थौंकन्हय् जिमिगु स्कूलय् नं विद्यार्थीयात म्होतिं नं ‘ए प्लस’ बीमाः धकाः अभिभावकतय्सं दबाब बिउ वयाच्वंगु दु। थज्याःगु दबाब देय्न्यंकं हे दु ।’

विश्वन्यंकं कोरोना भाइरसया महामारी न्यना वनेवं वंगु चैत ६ गते जुइ माःगु एसईई परीक्षा सरकारं स्थगित याःगु खः । लिपा जाँच कायेगु सम्भावना हे मदयेवं विद्यालयतय्सं हे मूल्यांकन यानाः विद्यार्थीयात अंक बीफइगु निर्णय सरकारं याःगु खः । राष्ट्रिय परीक्षा नियन्त्रण बोर्डं थौंकन्हय् विद्यार्थीयात अंक गुकथं बीगु धकाः कार्यविधि दयेकाच्वंगु दुसा उकिया आधारय् अंक बीगु कथं विद्यालयतय्सं तयारी यानाच्वंगु दु ।

सम्बन्धित बुखँ

LEAVE YOUR COMMENTS