थुगुसी नं वीरेन्द्रभक्तं म्ये प्वाः खंकीगु

थिमि (नेपालभाषा टाइम्स) – थुगुसी नं यँयाःया इलय् थन जुइगु म्ये प्वाः खनीगु जात्राय् मध्यपुर निवासी वीरेन्द्रभक्त गजू श्रेष्ठं म्ये प्वाः खंकादीगु जूगु दु। निक्वःखुसी म्ये प्वाः खंकादीम्ह वय्कलं थनिं स्वदँ न्ह्यः नं यँयाःया इलय् म्ये प्वाः खंकादीगु खः । मध्यपुर थिमि नगरपालिकाय् प्यसःत्या दँ न्ह्यवनिसेंया परम्परायात ल्यंका तयेगु ताःतुनाः थुगुसी निक्वःखुसी थम्हं म्ये प्वाः खंके त्यनागु श्रेष्ठं ‘नेपालभाषा टाइम्स’ कनादिल ।

वंगु झिंखुदँ न्ह्यवंनिसें दिनाच्वंगु यँयाःया झ्वलय् म्ये प्वाः खनेगु जात्रा वय्कलं स्वदँ न्ह्यः शुरु यानादीगु खः । थगुने वय्कः बर्खि माःगु, नगुने म्ये प्वाः खंकाः जात्रायात निरन्तरता बियादीम्ह बालकराम श्रेष्ठ नं म्हं मफुगु व मेपिं म्ये प्वाः खंकेत न्ह्यःने मवःगुलिं जात्रा दिउगु खःसा थुगुसी वीरेन्द्रभक्तं म्ये प्वाः खनीगु जुइवं वय्कःया छेँय् थुकिया आवश्यक थीथीकथंया तयारी नं तःजिक न्ह्यायेधुंकूगु दु ।

थुगुसी निक्वःखुसी वीरेन्द्रभक्तं म्ये प्वाः खंकेत तयार जुयादीवं आः हाकनं थ्व जात्रां निरन्तरता काइगु जूगु दु। थ्व हे वइगु भदौ १७ गते यँयाःपुन्हिकुन्हु थनया दिगु त्वालय् च्वंगु दबुलिइ बहनि म्ये प्वाः खनीगु थ्व जात्रा तान्त्रिक विधिपाखें भिं-उसाँय्या कामना यासें थ्व परम्परा शुरु याःगु धइगु जनधारणा दु ।

स्वदँ न्ह्यः वीरेन्द्रभक्तं न्हापांखुसी म्येँ प्वाः खनाः थ्व जात्रा न्ह्याकादीगु इलय् मध्यपुर थिमि नगरपालिकां स्वंगू लख नीप्यद्वः तका दांया अक्षय कोष स्वना बिउगु खः । नगुने बालकरामं म्ये प्वाः खंगु इलय् निगू लाख थप यानाः बीवं आः कोषय् ५ गू लाख नीप्यद्वः तका दां थ्यनेधुंकूगु दु । थ्व हे दामं वइगु भदौ १० गते म्ये प्वाः खनेत नासः पुजा याइगु जूगु दुसा वयां लिपा भदौ १६ गते सिद्धिकालीइ खड्ग काः वनी । भदौ १७ गते बहनिसिया इलय् दिगु त्वालय् वीरेन्द्रभक्तं निक्वःखुसी म्ये प्वाः खंकी ।

म्ये प्वाः खंकेत न्हापा न्हापा लछि न्ह्यः हे कौयात किसलिं छायाः मुलु दयेकेत इनाप याः वनेगु चलन दु । आः धाःसा बाःछि न्ह्यः वइगु साउन ३२ गते जक मुलु दयेकेत कौयाथाय् किसलिं छाः वनेगु ज्याझ्वः दुगु न्हापा म्ये प्वाः खंकादीम्ह बालकरामं ‘नेपालभाषा टाइम्स’ यात कनादिल ।

थौंकन्हय् थुगुसी म्ये प्वाः खंकादीत्यंम्ह वीरेन्द्रभक्तया छेँय् अय्लाः-थ्वँ कायेगु, सुचुकुचु यायेगु नापं विधि पूवंका यायेमाःगु थीथी ज्याझ्वः यानाः माःगु तयारी जुयाच्वंगु दु ।