रक्तसंचार केन्द्रया भवन प्रदर्शनी मार्गय्

येँ -केन्द्रीय रक्तसंचार केन्द्रया भवन थनया प्रदर्शनी मार्गय् हे निर्माण जुइगु जूगु दु । नेपाल रेडक्रस सोसाइटीपाखें संचालन जुयाच्वंगु केन्द्रीय रक्तसंचार केन्द्रया भवन २०७२ साल बैशाख १२ गतेया तःभुखाचं क्षति जुइवं थौंकन्हय् यलया ग्वार्कोय् अस्थायी रुपं संचालन जुया वयाच्वंगु खः ।
रक्तदाता व हि आवश्यक जुइपिं विरामीया थःथितिपिंत सहज पहुँचया थाय् जूगुलिं प्रदर्शनी मार्गय् हे केन्द्रया अत्याधुनिक भवन निर्माण यायेत्यंगु खः । २०२३ सालंनिसें सुरक्षित व स्वच्छ रक्तसंचार सेवा नापं हिया अनुसन्धानतकं याना वयाच्वंगु केन्द्र भुखाचं बांमलाक क्षति जूगु खः । केन्द्रया उगु भवन विश्व स्वास्थ्य संगठन (डब्लुएचओ)या भवन मापदण्ड कथं दयेकीगु जूगु दु । थ्व हे झ्वलय् आः निर्माण जुइगु अत्याधुनिक भवन उपकरणया निंतिं थाइल्याण्डया (थाई) रेडक्रसं नेपाल रेडक्रसयात ४५ लाख तका दांया आर्थिक ग्वाहालि नं प्रदान याःगु दु ।

रक्तसंचार केन्द्रया उगु भवनया शिलान्यास आः नकतिनि नेपाल रेडक्रसया अध्यक्ष संजीव थापा, येँ महानगरपालिकाया प्रमुख विद्यासुन्दर शाक्य व नेपाःया निंतिं थाइल्याण्डया राजदूत भागवत तान्स्कुलं मंकाःकथं यानादीगु खः । रेडक्रसं बिउगु जानकारी कथं वइगु दत्या (झिंच्याला)या दुने न्यातँजाःया अत्याधुनिक भवन निर्माण यायेगु लक्ष्य कयातःगु दु । न्हूगु भवनय् रक्त सेवालिसें बिस्कं अनुसन्धान कक्ष तकं दइ । ज्याझ्वलय् सांसद जीपछिरिङ शेर्पा, येँ मनपा प्रमुख शाक्य, थाई राजदूत तान्स्कुल, सोसाइटीया अध्यक्ष थापा, महामन्त्री देवरत्न धाख्वा, रक्तसंचार केन्द्रया निर्देशक डा. रेखा मानन्धर व थाई रेडक्रसया निर्देशक डा. उबोनवोन चारुवाङग्रीटं रक्तसंचार सेवाया महत्व बारे नवानादीगु खः ।