जिगु लुमन्तिइ हिरोसिमा बोटानिकल गार्डेन
हिरोसिमा बोटानिकल गार्डेन छु खः ?
जापानय् यक्व यक्व बोटानिकल गार्डेनत दु । हिरोसिमायागु साइकि–कु नांगु डाँडाय् पलिस्था यानातःगु बोटानिकल गार्डेन हे हिरोसिमा बोटानिकल गार्डेन खः । थ्व गार्डेन ह्वाइत इन्लाय्ण्ड सी नांगु समुन्द्रयात माया यानाः स्वयाच्वं थें लसि वः ।
थ्व गार्डेनय् थीथी बनस्पतित दु, गुलिं जापानं हे संकलन याना हया पिनातःगु, गुलिं गुलिं मेगु देशं हयाः पिनातःगु । थ्व गार्डेनय् बांबांलाःगु स्वांमात दुगुलिं जितः थ्व गार्डेन अतिकं बांलाः ताः ।
थ्व गार्डेन १८३ हेक्टर जग्गाय् दयेकातःगु खः । थन ११,४०० प्रजातिया २३,४०० वनस्पतिमा दु । थन गार्डेनय् बैज्ञानिकतय्सं अनुसन्धान यानाच्वंगु दु, नापं अनुसन्धानया लिच्वः, विकासया लिच्वः स्वःवइपिंत थीथी ज्याझ्वः दयेका शिक्षा बिइगु नं यानाच्वंगु दु ।
चाःहिलेगु थाय्
थ्व गार्डेनय् यक्वः चाहिलेगु थाय् दयेकातःगु दु । थ्व गार्डेनय् खुगू ग्रीनहाउस दु । यक्व तांन्वःथाय् दइगु वनस्पति पिनातःगु ग्रीनहाउस, लखय् दइगु वनस्पति स्वां ह्वयेकातःगु ग्रीनहाउस, बिगोनिया ग्रीनहाउस, फुश्चिया ग्रीनहाउस, अर्किड ग्रीनहाउस, क्याक्टस ग्रीनहाउस । थन थीथी तहःयापिं विद्यार्थीपिंत प्रकृति व बनस्पतिया बारे ज्ञान बिइगु कार्यक्रमत नं दयेकातःगु दु । थन बनस्पति उत्पतिया बारे सिइकेगु थाय्, चट्टानया चट्टानय् वइगु बनस्पति स्वयेगु थाय्, जापानया मौलिक उद्यान स्वयेगु थाय्, अले चिया सम्बन्धि वनस्पति स्वयेगु थाय् दु ।
स्वयेगु वनस्पतित
भिक्टोरिया अमाजोनिका, वँचुगु पलेस्वां, तुयुगु पलेस्वां, ह्याउँह्याउँ नःगु पलेस्वां थेंज्याःगु बनस्पति लखय् स्वयेगु न्ह्याइपुसे च्वं । पिचरप्लान्ट, भेनसफ्लाइ ट्रायप, डोसेरा नांगु थीथी की नइगु बनस्पतित स्वयेबलय् मनय् खँ ल्हाइगु । तमला थें बांलूगु क्याक्टस, थीथी रंगयागु गुलाब स्वां, फुश्चिया, बिगोनिया स्वयेबलय् मन हे याउँसे च्वं । नापं ब्वया वनाच्वंम्ह वनस्पति हेँय्, बल्ब बांलुइकातःगु बनस्पति स्वयेबलय् मनय् लसतां भयेब्यू । थन हरेक बनस्पतिया नां बियातःगुलिं बनस्पति म्हसीकेगु, बनस्पतिया छ्यलाबुला सयेकेगु व थुइकेगु याये ज्यू, नापं बैज्ञानिकतलिसे खँल्हाबल्हा यानाः उमिसं यानाच्वंगु अनुसन्धान नं सीके ज्यू । थन चीधंगु हर्बेरियम संग्रहालय नं दु, अथे जूगुलिं हर्बेरियमया बारे सयेकेत नं थ्व गार्डेन उपयुक्त जू ।
नयेत्वनेगु थाय्
थ्व गार्डेनय् नये पित्याइबलय्, प्याः चाइबलय् प्याःचा लंकेत क्याफ्टेरिया, क्याफे व आइसक्रिम पसःत दु । थन परिवार लिसे च्वनाः, पासापिं लिसे गफ यानाः कफि व जापानिज च्या त्वनेबलय् यक्व आनन्द वः ।
अनुसन्धान याइगु थाय्
थन दुगु प्रयोगशालाय् थीथी अनुसन्धान यानाच्वंगु दु । थीथी बनस्पतिपाखें न्ह्याइपुसे च्वंगु बांलासे च्वंगु, स्वःवःपिनिगु मन न्ह्याइपुसे च्वंक स्वयेगु, बांलूगु बनस्पति दयेकातःगु दु । नापं मनूत वइबलय् न्ह्यइपुक फोटो कायेत ज्ञानवद्र्धक वनस्पतिया थासात दयेका तःगु दु । नापं चाःह्यू वःपिनिगु मनोभावया बारे नं अध्ययन याना च्वनी । नापं छुं छुं देशयापिं मनूत थ्व हिरोसिमा बोटानिकल गार्डेनय् चाःह्यू वःगुया कारण छु छु खः धकाः नं अनुसन्धान यानाच्वनी ।
अनुसन्धान याइपिं बैज्ञानिकत
थन गार्डेनय् स्वांया बारे, गार्डेन डिजाइनया बारे अध्ययन याइपिं अनुुसन्धानकर्तापिं ज्या यानाच्वंगु दु । अनुसन्धान याइपिं थन गार्डेन व मेगु विश्वविद्यालयय् ज्या यानाच्वनी । गार्डेनय् याःगु ज्या विश्वविद्यालयय् ब्वनीपिं विद्यार्थीपिंत स्यनेगु यानाच्वंगु दु । नापं विश्वविद्यालययापिं बागवानीबिज्ञपिं गार्डेनयापिं अनुसन्धानकर्तापिं लिसे मिले जुयाः ज्या याना नं च्वंगु दु । अनुसन्धानया लिच्वःत बैज्ञानिक जर्नलय् पिकाःगु खँ जिपिं उगु गार्डेनय् इस्वी सम्वत २०१७ सालय् चाह्यू वनाबलय् मासाओ यामामोटो बैज्ञानिकं कनादिल । नापं वय्कलं थःगु च्वसुत जितः बियादीगुु खः ।
ग्वाहालि याइपिं कर्मचारीत
टिकेट काउन्टरय् च्वनेत, बनस्पति पिइत, लः बिइत, स्वां मिइत व क्यान्टिनय् ज्या यायेत कर्मचारीत दु । इमिसं अनुसन्धानकर्तातय्त नं ग्वाहालि बियाच्वनी ।
चाःह्यू वनीपिं मनूत
थ्व गार्डेनय् मस्त, ल्याय्म्ह ल्यासेपिं व बुराबुरीपिं यक्व स्वः वं । विद्यालय व विश्वविद्यालययापिं शिक्षक व विद्यार्थीपिं शैक्षिक भ्रमण नं वनीगु याः । गार्डेनया डिजाइन सयेकीपिं, स्वांयात मतिना याइपिं गृहणीपिं नं अन गार्डेनय् वनाः आनन्द कयाच्वनी ।
LEAVE YOUR COMMENTS