टोखाया संक्रमितत किराना पसल्या व ज्योतिष

येँ – टोखा नगरपालिकाय् कोरोना भाइरसाया संक्रमण जूपिं मध्ये छम्ह किराना पसख्या व मेम्ह ज्योतिष जूगु खँ सीदुगु दु । नगरपालिकाया प्रवक्ता बच्चुराज बस्यालं किराना पसख्या व ज्योतिषयात संक्रमण जूगु पुष्टि यानादिल ।

नगरपालिका अन्तर्गत वडा नम्बर ६या ४१दँया मिजं किराना पसल्या खः । ग्राण्डी अस्पताल स्वयां भचा च्वये लाक उम्ह संक्रमितया पसः चायेकातःगु खः । उम्ह संक्रमितं लकडाउनया छुं दिं न्ह्यः निसें जक किराना पसः चायेकूगु खः ।

छुं न्हि न्ह्यः जक नगरपालिका अन्तर्गत जनप्रतिनिधित व अत्यावश्यक पसःया पसल्यातय्त आरटीडी विधिं कोरोनाया परिक्षण याःगु खः । उगु इलय् पोजेटिभ रिपोर्ट वम्ह किराना पसल्याया पीसीआर याःगु इलय् नं रिपोर्ट पोजेटिभ वःगु खः ।

अथेहे वडा नम्बर ३या २७दँया संक्रमित ल्हाः स्वइम्ह ज्योतिष खः । टोखाया धनेश्वरय् च्वनीम्ह उम्ह मनू कोरोना भाइरसाया कारणं सीम्ह सिन्धुपाल्चाेकया मिसा नाप सम्कर्पय् वःम्ह खः । महाराजगञ्जया त्रिवि शिक्षण अस्पतालय् भर्ना जूगु इलय् उम्ह मिसा नाप सम्पर्कय् वःगु खः । वहे कारणं उम्ह मनूयात परीक्षण याःगु इलय् पाेजेटिभ खनेदुगु खः ।

आः निम्ह संक्रमितनाप सम्कर्पय् वःपिनि कन्ट्याक्ट ट्रेसिङ यायेगु ज्या जुयाच्वंगु जानकारी प्रवक्ता बस्यालं बियादिल । वय्कलं ट्रेसिङ यायेगु ज्या सिधयेधुंकाः सम्पर्कय् वःपिं मनूतय् परीक्षण यायेगु खँ धयादिल ।

सम्बन्धित बुखँ

LEAVE YOUR COMMENTS