ने. सं. ११४६ बछलागा पञ्चमी -

तरकारी परीक्षणं सरकारयात संकट,सल्लाहकारया ट्विटं मेगु बबाल

येँ – सरकारं यानाच्वंगु ज्याखँयात कयाः स्वयम् सत्तारुढ दल दुने हे अप्वया वःगु आलोचनाया दथुइ प्रधानमन्त्रीया राजनीतिक सल्लाहकार बिष्ण रिमालं यानादीगु छगू ट्विटं छ्वःमिइ घ्यः लुइगु ज्या याना बिउगु दु । प्रमया सल्लाहकार रिमालं म्हिगः थःगु ट्विट मार्फत् छगू सन्देश बिसें सरकारया विरोध यानाच्वंपिं सत्तारुढ दलया सांसदतय्त ‘छौंडा’ या संज्ञा बियादीगु खः ।

द्यःयात त्वःता तइपिं दुगुचा, द्वहं वा भौचियात खस नेपाली भासं ‘छौंडा’ धाइगु खः । राजनीतिक सल्लाहकार रिमालं ‘थ्व छौंडात थः हे सना हःपिं खः लाकि थुमित सुं मेपिंसं त्वःता हःगु खः ?’ धइगु न्ह्यसः तसें ट्विट यानादीगु खः । वय्कःया ट्विट वयेवं म्हिगःनिसें सत्तारुढ दलया राजनीति उकी हे चाःहिलाच्वंगु दु ।

नापं थ्व ट्विटयात कयाः सामाजिक सञ्जालय् छम्हं मेम्हेसित कडा रुपं वाद–प्रतिवाद यायेगु ज्या नं तीव्र रुपं न्ह्याना वःगु दु ।प्रम ओलीया विरोधी सांसद व नेतातय्सं कडा रुपं्र थुकिया प्रतिकार याना हःगु दुसा गुलिस्यां उकियात समर्थन यानाः नं च्वयाहःगु दु ।थ्वहे ट्विटया खँयात न्ह्यःने तयाः गुलिखे नेतातय्सं राजनीतिक सल्लाहकार रिमालया राजीनामा काये माःगु तकया माग याना हःगु दु ।

रिमालया कारणं यानाः हे थौंकन्हय् सरकार व सत्तारुढ दलया मेपिं नेतातय् दथुइ दूरी अप्वःगु खः धासें रिमालयात कारवाही यायेमाःगु माग समेत याना हःगु दु । म्हीग तिनि नेकपाया संसदीय दलया बैठकय् सरकारया कडा आलोचना जूगु खः । उगु बैठकय् पार्टीया नेता भिम रावलं तरकारीया विषादी परीक्षण यायेगु ज्याय् भारतया दबाब वयेवं सरकार लिचिउगु खँयात कयाः प्रम ओलीया कडा आलोचना यानादीगु खः ।

वय्कःया आलोचना वःगुया छन्हु लिपा हे प्रमया राजनीतिक सल्लाहकारया थ्व ट्विट वःगुलिं वय्कलं छन्हु न्ह्यः च्वंगु दलया बैठकय् सरकारया आलोचना याःपिं सांसदतय्त हे ‘छौंडा’ या संज्ञा बिउगु विश्लेषण याना हःगु दु ।

ट्विट याःम्ह बिष्णु रिमाल सु खः ?
वालुवाटारय् ‘सेकेण्ड प्राइमिनिस्टर’ कथं नांजाःम्ह राजनीतिक सल्लाहकार विष्णु रिमालयात स्वयम् प्रम ओलीया पक्षधरतय्सं मययेकू । प्रम ओलीयात रिमालं पूरा हे थःगु ‘ग्रिप’ य् तयाः गुमनाम अवस्थाय् तयेगु याना तल धइगु समेत द्वपं बीगु याः ।

प्रमयात वइगु हरेक फोन लिसः बीगु ज्या याइम्ह रिमालं हे प्रमयात मखुगु सूचना बियाः पिने बदनाम जुइगु ज्या याकाच्वन धइगु द्वपं नं बीगु याः । प्रम ओली निक्वः प्रम जूगु दुसा निक्वलं रिमालयात सल्लाहकार दयेकूगु खः ।