फास्ट ट्र्याकया लागत अप्वल

येँ – येँ–निजगढ फास्ट ट्र्याकया लागत ६३ अर्ब अप्वइगु जूगु दु । नकतिनि जूगु विस्तृत आयोजना प्रतिवेदन (डिपिआर) कथं फास्ट ट्र्याकया लागत ६३ अर्बं अप्वया १ खर्ब ७५ अर्ब थ्यनीगु खँ धाःगु दु । थ्वयां न्ह्यः यानातःगु डिपिआरय् १ खर्ब १२ अर्ब तुइगु खँ धयातःगु दु ।
न्हूगु डिपिआर कथं सतकया हाकः नं प्यंगू किलोमिटर म्हो जुइगु जूगु दु ।

लँया हाकः म्हो जूसां सुरुङ्ग मार्ग थप जूगुलिं लागत अप्वइगु खँ धाःगु दु । न्हापा ७६ किमि धयातःगु थ्व सतक आः ७२ किमिया जुइ, तर सुरुङ्ग मार्ग स्वथाय् दइ । न्हापाया डिपीआरय् छथाय् जक सुरुङ्ग मार्ग तयातःगु खः । न्हूगु डिपीआर कथं महादेवडाँडाय् ३.३५५ किमि, धेन्द्रेडाँडाय् १.६३ किमि व लेनडाँडाय् १.४३ किमि यानाः मुक्कं ६.४१५ किमि सुरुङ्ग मार्ग दइगु जूगु दु ।

न्हूगु डिपीआरय् थ्व सतकया जिरो प्वाइन्ट ख्वना हे जुइगु न्ह्यथनातःगु दुसा अन्तिम विन्दू निजगढ जुइ । थ्व सतकयात कयाः ख्वनाय् धाःसा तःधंगु विरोध जुयाच्वंगु दु । थ्व फास्ट ट्र्याक दयेकीबलय् विशेष कथं झिंखुगू ताँ सहित मुक्कं ८७ पु ताँ दयेकीगु जुइ । थ्व सतक प्यंगू लेनया जुइसा ब्या २५ मिटरया जुइ ।

नेपाली सेनां दयेकाच्वंगु थ्व सतकय् वंगु निदँया दुने १० प्रतिशत जक ज्या क्वचाःगु दु । थ्व आयोजना प्रमुख प्राविधिक जुयाच्वनादीम्ह सेनानी शरदलाल श्रेष्ठं निदँय् १० प्रतिशत जक ज्या जूसां थ्व अवधीइ जग तयेगु ज्या जूगुलिं आः सतकया ज्या तीव्र गतिं न्ह्याइगु खँ धयादीगु दु । वय्कलं न्हूगु डिपीआर स्वीकृत जुया वयेवं सुरुङ्ग मार्ग दयेकेगु ज्या तुरुन्त हे न्ह्याइगु खँ धयादीगु दु ।

न्हापा भारतया कम्पनीं दयेकूगु डिपीआर उगु कम्पनीं लःमल्हायेवं सरकारं कोरियान कम्पनी सुसुङ इन्जिनियरिङ्गयात न्हूगु डिपीआर दयेके बिउगु खः । डिपीआर स्वीकृतिया निंतिं मन्त्रिपरिषद्य् न्ह्यब्वयेधुंकूसां आःतक स्वीकृत धाःसा जूगु मदुनि ।