धर्मकीर्ति विहारयात मनपापाखें नसाज्वलं ग्वाहालि

येँ । कोरोना भाइरस संक्रमणया कारणं बन्द जुयाच्वंगु थनया धर्मकीर्ति विहारय् च्वनाच्वंपिं १७ म्ह प्रव्रजित गुरुमांपिनि लागिं येँ महानगरपालिकां आवश्यक नसाज्वलंया व्यवस्था याना बिउगु दु ।

कोरोना संक्रमणया कारणं सकलें छेँय् हे च्वनेत सरकारं इनाप याः कथं धर्मकीर्ति विहार लगायत स्वनिगःया सकलें विहारया भन्ते गुरुमांपिं थौंकन्हय् गनं पिहां मवँसे थःथःगु विहारय् हे च्वनेगु यानाच्वंगु दु । लिसें विहारय् नियमित पूजा बाहेक धर्मदेशना व तःधंगु बुद्ध पूजाया ज्या नं बन्द जुयाच्वंगु दु । उपासक उपासिकापिं वये–वने यायेगु ज्या नं ठप्प जुयाच्वंगु दु । थ्वहे अवस्थायात ध्यानय् तयाः येँ मनपापाखें धर्मकीर्ति विहारय् हे च्वनाबिज्याइपिं आवासीय गुरुमांपिनि लागिं करिब लछियात गाक्क नसाज्वलंउपलब्ध यानाबिउगु खः ।

येँ मनपाया थ्व ज्याया लागिं सुभाय् देछासें धर्मकीर्ति विहारया प्रमुख धम्मवती गुरुमांपाखें येँ मनपाया प्रमुख विद्यासुन्दर शाक्य, येँ मनपा २५ वडाया रमिता कमल स्थापित, प्रमुख प्रशासकीय प्रमुख व सकल मनपा दुजःपिंत साधुवाद बियाबिज्याःगु दु ।