सनसिटीया फुक्कं परीक्षण नेगेटिभ
येँ – बेलायतं लिहां वःपिं निम्ह मनूयाके कोरोना भाइरस पोजिटिभ खने दयेवं सरकारी सिजय् लाःगु थनया पेप्सीकोलास्थित सनसिटी एपार्टमेन्टय् थौं काःगु परीक्षणय् सकलें नेगेटिभ पिहां वःगु दु ।
सरकारं छ्वया हःपिं स्वास्थ्यकर्मीतय्सं एपार्टमेन्टया क्वय् च्वनाः थौं र्यापिड टेस्ट याःगु खः । र्यापिड टेस्टय् सकलें नेगेटिभ पिहांवःगु खँ उगु हे एपार्टमेन्टय् च्वनादीम्ह सञ्चारकर्मी राज स्यस्यं ‘नेपालभाषा टाइम्स’ यात कनादिल ।
स्वास्थ्यकर्मीतयसं थौं सुथय् अन ३०० म्ह मनूतयगु परीक्षण याःगु खः । उकी सकलें नेगेटिभ पिहां वयेवं अपार्टमेन्टय् च्वंपिं सकस्यां सन्तोषया सासः ल्हाःगु दु ।
कोरोना संक्रमण पोजिटिभ पिहां वःपिं मनूत एपार्टमेन्टया ‘ए’ ब्लकय् च्वनीपिं खः । थ्व एपार्टमेन्टय् मुक्कं न्यागू ब्लक दु । थौं ‘ए’ ब्लकय् च्वंपिं मनूतयगु परीक्षण काःगु खः । आः मेगु ब्लकय् च्वंपिनिगु परीक्षण कायेगु वा मकायेगु धइगु लिपा जक निर्णय याइ धाःगु दु ।
थनया न्यागुलिं ब्लकय् ४८० गू परिवारया २२०० म्ह मनूत च्वनाच्वंगु दु । थनया छगू ब्लकय् च्वंपिं मनूतयके कोरोना पोजिटिभ पिहां वल धायेवं एपार्टमेन्टय् तःधंगु हे आतंक ब्वलंगु खःसा मनूत सुं हे पिहां मवसे च्वनाच्वंगु खः ।
स्वास्थ्य परीक्षण लिपा सकलें नेगेटिभ पिहां वयेवं एपार्टमेन्टय् च्वंपिंसं थःथःगु क्वथाया झ्यालय् च्वनाः देय्मा थानाः सुभाय् बिउगु खः ।
उगु एपार्टमेन्टय् च्वनीपिं कलाः, भाःत व मांम्ह यानाः स्वम्ह मनू मध्ये मांम्ह व कायम्हेसित जक पोजिटिभ पिहां वयाः कलाःम्हेसिके धाःसा नेगेटिभ पिहां वःगु खः । स्वास्थ्यकर्मीतय्सं अन ज्या याइपिं निम्ह मिसा मस्तय्गु र्यापिड परीक्षणय् नं नेगेटिभ पिहां वःसां उमिगु स्वाब धाःसा थप परीक्षणया लागिं यंकूगु दु ।
LEAVE YOUR COMMENTS