मलेसियाय् न्हूगु श्रमिक नीति

नेपाःमि ज्यामि मलेसियाय् यंकेत अझं निला ई काइगु
येँ – मलेसियां नेपाःमि ज्यामि यंकेत अझं निला ई काइगु खँ धाःगु दु । विदेशी ज्यामि आपूर्ति बारे तयार यायेत्यंगु न्हूगु प्रतिवेदन मवःतले नेपाःया ज्यामि आपूर्ति यायेमफइगु खँ मलेसियां धाःगु दु ।

विदेशी ज्यामि कायेगु सम्बन्धी नीति दयेकेत मलेसिया सरकारं नीस्वंगु कार्यदलं ज्या यानाच्वंगु व उगु कार्यदलया प्रतिवेदन लिपा जक विदेशी ज्यामि आपूर्ति यायेफइगु खँ मलेसियाया मानव संशाधन राज्यमन्त्री महफुज ओमारं धाःगु खँ ‘द सन डेली’ पत्रिकां च्वःगु दु ।

राज्यमन्त्री ओमारं विदेशी ज्यामि आपूर्ति यायेगु सम्बन्धी प्रतिवेदन सहलहया चरणय् दुगु धासें विदेशी ज्यामि सम्बन्धी नीति उगु हे कार्यदलया सुझाव कथं क्वःछीगु खँ धाःगु दु । राज्यमन्त्री ओमारं थौंकन्हय् ज्यामि मदयाः समस्या जुयाच्वंगु खःसां नं समस्या याकनं समाधान जुइ खँय् थः विश्वस्त दुगु खँ धाःगु दु ।

गोकर्ण विष्ट श्रम मन्त्री जुइधुंकाः नेपालं मलेसियाय् ज्यामि छ्वयेगु ज्या बन्द याःगु खः । श्रमिकयाके म्यानपावर कम्पनीतय्सं आपाः ध्यबा काःगु धासें मन्त्री विष्ट वंगु जेठ महिनानिसें नेपालं मलेसियाय् ज्यामि छ्वयेगु ज्या बन्द याना बिउगु खः ।

मन्त्री विष्टया थुगु पलाः लिपा म्यानपावर कम्पनीतय्सं विरोध याना वयाच्वंगु खःसां नं मलेसियाया सरकारं धाःसा नेपाःया माग कथं न्हूगु नीति दयेकाः नेपाःमि ज्यामि यंकेत सहमत जूगु खः । थ्व स्वयां न्ह्यः मलेसियां पुलांगु हे सहमति कथं नेपाःया ज्यामि यंकेगु धकाः धाःगु खःसां नं मन्त्री विष्टं उकियात अस्वीकार यानाबिउगु खः ।

नेपाःया अडान व मेगु श्रमिक छ्याहइगु देय्या चिउताः लिपा मलेसियां श्रमिक आपूर्ति नीति परिमार्जन यायेगु निंतिं कार्यदल दयेकाः ज्या न्ह्याकाच्वंगु खः ।