नक्वाः कुमारि माजुया पुजा

येँ – ह्यूमत मिसा पुचःपाखें नक्वातय् च्वंम्ह जीवित देवी कुमारि माजु दिनिशा डंगोलया पुजा याःगःगु दु । पुचःपाखें वंगु शनिवाः नक्वातय् हे वनाः कुमारि पुजा याःगु खः । पुचःपाखें स्वदँय् छक्वः देशय् विराजमान जुयाच्वना बिज्याःपिं जीवित देवी कुमारि माजुया पुजा यायेगु ज्याझ्वःकथं स्वक्वःखुसी थ्व ज्याझ्वः जूगु खः ।

नक्वाः कुमारि माजुया पुजा यायेत नेकपाया वरिष्ठ नेतालिसें पुलांम्ह प्रधानमन्त्री झलनाथ खनाल, येँ महानगरपालिकाया प्रमुख विद्यासुन्दर शाक्य, येँ मनपा १२ वडा अध्यक्ष विकास डंगोल, १८ वडा अध्यक्ष न्हुछेकाजी महर्जन, २३ वडाअध्यक्ष मचाराजा महर्जनलिसें येँ, यल, थिमि लगायत थीथी थासं यानाः खुसः स्वयां अप्वः नक्वाः वंगु खः ।

कुमारि पुजा क्वचायेकाः अनया भैरवी माध्यमिक विद्यालयय् छगू बःचाधंगु ज्याझ्वः नं जूगु खः । ज्याझ्वलय् नेकपाया वरिष्ठ नेतालिसें पुलांम्ह प्रम खनालं नेपाःयात म्हसीका तइगु धर्म, संस्कारयात ल्यंका तयेगु जिम्मेवारी झी सकसिगुं खः धयादिल ।

अथे हे येँ मनपा प्रमुख शाक्यं येँया कुमारिया संरक्षणया निंतिं पूर्वाधार दयेकाः न्ह्याः वनेधुंगु व वर्तमान श्री कुमारि, श्री गणेश व श्री भैरवया निंतिं मासिक भत्ताया व्यवस्था यानागु, थुगुसीनिसें मखं व किलाघः त्वाःय कुमारिलिसें पूर्व कुमारि, गणेश व भैरवयात नं सुविधा बीगु व्यवस्था यानागु जानकारी बियादिल ।

कुमारि पुजा ज्याझ्वःया प्रचार संयोजक राजु नापितं देशय् झिंछम्ह कुमारि माजु दुगु खःसां वसन्तपूया कुमारि माजुयात जक सकसिनं म्हसीका वयाच्वंगुलिं मेमेगु थासय् दुगु कुमारियात नं म्हसीकेगु व देश विदेशय् प्रचार यायेगु ल्याखं दुगु ज्याझ्वः यानागु जानकारी बियादिल ।

पुचःया नायः मचानानी महर्जनया सभापतित्वय् जूगु ज्याझ्वलय् विदुर नगरपालिकाया प्रमुख सन्जु पण्डित लगायत वडाअध्यक्ष व मेमेपिंसं नं नुगःखँ प्वंकादीगु खः । पुचःपाखें थ्वयां न्ह्यः बसन्तपू स्थित राजकीय कुमारिलिसें मखं, किलाघः, तोखा, सक्व, पन्ति, यल, बुंग, ख्वप आदि थासय् च्वंपिं कुमारिया नं पुजा यायेधुंकूगु दु ।

सम्बन्धित बुखँ

LEAVE YOUR COMMENTS