ओली छाय् गौतमया विपक्षय् वन ?

येँ – राष्ट्रिय सभाय् सरकारया सिफारिसय् राष्ट्रपतिं नियुक्त याइम्ह छम्ह सांसद सु हयेगु धयागु खँय् सत्तारुढ दल नेकपा दुने विवाद पिहां वःगु दु । प्रधानमन्त्री लिसें पार्टी अध्यक्ष केपी ओलीं थः उपाध्यक्ष वामदेव गौतमयात राष्ट्रियसभाय् हयेत तयार मदु धइगु खँ खुलस्त यायेवं थ्व सम्बन्धी तःधं जुयाः पिहां वःगु खः ।

सूत्रतय्सं धाः कथं प्रम ओली वामदेव गौतमयात राष्ट्रिय सभाय् यंके मखु धइगु लाइनय् वंगु खास यानाः संविधान संशोधनया खँ न्ह्यःने वयेधुंकाः तिनि खः । प्रम ओलीया सरकारं निदँ पूवंकेवं संविधान संशोधन यानाः जूसां राष्ट्रिय सभाया सांसदयात प्रधानमन्त्री दयेके फइगु व्यवस्था यायेगु धकाः पार्टी दुने तयारी शुरु जूगु खः । थुकिं यानाः प्रम ओलीयात झस्के याना बिउगु दु । वय्कः न्यादँ पूवंक हे सरकार चले याना वनेगु मनःस्थितिइ दुगु इलय् पार्टी दुने प्रधानमन्त्री हिलेगु चलखेल जूगुलिं वय्कः सन्तुष्ट जुयादीगु मदु । प्रधानमन्त्री हिलेगु थ्व चलखेलया नायक धाःसा वामदेव गौतम जुयाच्वंगु दु । उकिं गौतमयात राष्ट्रिय सभाय् यंकेगु ज्या हे दिका बिल धाःसा थ्व चलखेल नं न्ह्याः वनी मखु धइगु ओलीया विश्लेषण दुगु सूत्रया दावी दु ।

वामदेवयात राष्ट्रिय सभाय् यंकेगु खँ छुं ई न्ह्यवंनिसें पिहां वयाच्वंगु खः । तर निर्णय धाःसा जुइ मफयाच्वन । अन्तिमय् जब ओली सरकार निदँय् क्यनाः सरकार विरुद्ध अविश्वासया प्रस्ताव दर्ता याःसां जिउगु संवैधानिक वातावरण तयार जुल, वयां लिपा वामदेव गौतमयात राष्ट्रिय सभाय् यंकेगु व उकिया नापनापं वामदेवया लागिं हे संविधान संशोधन यायेगु धकाः पार्टीया छुं वरिष्ठ नेतातय्सं याःगु कुतःया प्रतिकार स्वरुप हे ओलीं डा. युवराज खतिवडाया पक्षय् अडान काःगु खः ।

सम्बन्धित बुखँ

LEAVE YOUR COMMENTS