नेपालभाषा स्टार म्यूजिक भिडियो अवार्ड लःल्हात

येँ – नेपालभाषाया दकलय् तःधंगु सिरपाया रुपय् नेपालभाषा स्टार म्यूजिक भिडियो अवार्डस् ११४० ज्याझ्वलय् थीथी न्यागू दर्जन सिरपा लःल्हागु दु । संसार क्रियसन्सया ग्वसालय् वंगु शुक्रवाः येँया प्रज्ञाभवनया हलय् थ्व अवार्ड ज्याझ्वः जूगु खः ।

ग्वसाः खलःया क्रियटिभ डाइरेक्टर स्वतन्त्र संसार महर्जनं नेपालभाषा संकिपा इतिहासय् न्हापांगु व दकलय् तःधंगु व आपालं विधाय् अवार्ड वितरण जूगु थ्व दकलय्न्हा पांगु व छगू जक नेपालभाषा म्यूजिक भिडियो अवार्ड जूगु खँ धयादिल । थ्व अवार्ड विशुद्ध नेपालभाषा कलाक्षेत्रय् समर्पित श्रष्टापिनिगु सम्मानार्थ लःल्हायेगु जूगुलिं थ्व थःगु हे कथं महत्वपूर्ण जूगु खँ नं वय्कलं धयादिल ।

ज्याझ्वलय् मूपाहाँ कथं शहरी विकास राज्यमन्त्री रामवीर मानन्धर मूपाहाँ कथं झायादीगु खःसा पुलांपिंत सम्मान व न्हूपिन्त प्रोत्साहन यायेगु आज्जु ज्वनाः संसार लाइफटाइम एचिभमेन्ट अवार्ड बरिष्ठ संगीतकार व सांगितिक व्यक्तित्व अमरराज शर्मा राजोपाध्याययात नगद २५,००० तका लिसें सम्मान याःगु खःसा संसार सप्तरंगी सम्मान बरिष्ठ कलाकार निर्देशक लेखक पवन जोशी, बरिष्ठ संगीतकःमि मनराजा नकःमि, बरिष्ठ सिने पत्रकार लिसें निर्देशक विजयरत्न असंबरे, ऐतिहासिक नायिका हिसिला महर्जन, ऐतिहासिक आदिवासी जनजाति महानायक जय श्रेष्ठ, बरिष्ठ गायक जुजुकाजी रंजित व बरिष्ठ मेकअप आर्टिष्ट सनमकुमार श्रेष्ठपिंत व संसार मल्टिपर्पोज सम्मान नेवाः अनलाइनन्यूजया सम्पादक लिसें म्यूजिक भिडियो डाइरेक्टर सम्पादक म्येच्वमि ललेन्द्र शाक्य, संसार अल राउण्ड भोलिण्टियर अवार्ड उजय शाही व संसार मल्टि टेलेण्ट अवार्ड सुरज नापितयात लःल्हागु खः ।

ज्याझ्वलय् फेसबुक प्रोफाइल पिक्चर्सय् पाखे थुगु अवार्डया टेम्लेट फ्रेम तयाः द्वःछिं मल्याक भ्यूअर्सं स्वयेत ताःलाःपिं कलाकार राजु महर्जन व सरिता वज्राचार्ययात नं सिरपाः बिउगु खः ।

थीथी विधाय् सिरपा लःल्हाःगु थ्व ज्याझ्वलय् उत्कृष्ट म्येच्वमिया सिरपा लोककवि राजभाई जकःमि, म्येच्वमि हःपा सिरपाः शैलेश बरे, भिडियो एडिटींग पाखेया हःपा सिरपा योवन शाक्ययात बिउगु दु ।

थ्यंमथ्यं खुघौतक जूगु थ्व ज्याझ्वलय् थीथी कलाकारपिंसं थीथी सांस्कृतिक ज्याझ्वः नं न्ह्यब्वःगु खः ।

सम्बन्धित बुखँ

LEAVE YOUR COMMENTS