इतुंबहालय् मंकाः इहि मुना

येँ-  इतुंबहाः मिसा पुचःया ग्वसालय् निन्हुयंकं मंकाः इहि मुना जुल । पुचःया ग्वसालय् वंगु शुक्रवाः व शनिवाः निन्हुयंकं उगु ज्याझ्वः इतुंबहालय् हे जूगु खः । पुचःया ग्वसालय् जूगु प्यक्वःगु इहि मुना ज्याझ्वलय् ख्वीनिम्ह मिसा मचाया इहि यायेगु ज्या जूगु पुचलं जानकारी बिउगु दु ।

पुचःया नायः भुवनहिरा शाक्यं नेवाः संस्कृतियात ल्यंकायेगु उद्देश्यं थुकथं मंकाः इहि मुना यानागु जानकारी बियादिल । ‘इहि यायेगु नेवाः समाजया पुलांगु परम्परा खः । थ्व मेगु गुगुं समुदाय दुने मदुगु संस्कृति जक मखु नेवाःतय्सं मयासे मगाःगु कर्मकान्डमध्ये छगू खः । जिमिगु पुचलं झी नेवाःतय्गु थज्याःगु अभौतिक संस्कृति जीवन्त जुयाच्वनेमा धइगु लक्ष्य कथं ज्या यानाच्वनागु दु’, वय्कलं धयादिल ।
पुचलं थुकथं मंकाः इहि यायेगु नापं कुमारि पु्जा नं याना वयाच्वंगु दुसा थीथीकथंया जात्रा पर्वय् नं सक्रिय रुपय् ब्वति कायेगु याना वयाच्वंगु दु ।

सम्बन्धित बुखँ

LEAVE YOUR COMMENTS