तोखाय् नेपालभाषा शिक्षण सहायक तालिम
येँ(नेपालभाषा टाइम्स)- येँया उत्तरी भेगय् लाःगु ऐतिहासिक नेवाः वस्ती तोखाय् स्थानीय पाठ्यक्रम अध्यापनया निंतिं प्रशिक्षकतय्त प्रशिक्षण तालिम शुरु जूगु दु । तोखा नगरपालिकां २ व ३ वडाया सामुदायिक व संस्थागत ब्वनेकुथिइ लागु याःगु पाठ्यक्रम ब्वंकेत नेपालभाषाया प्रशिक्षकया निंतिं सहायक प्रशिक्षण तालिम शुरु याःगु खः ।
नगरपालिकाया शिक्षा, खेलकुद व युवा शाखाया ग्वसालय् ३ वडाया ज्याकूया सभाहलय् वंगु सोमवाःनिसें उगु तालिम शुरु जूगु खः । शाखाया ग्वसालय् मातृभाषा संरक्षण अभियान तोखा व नेवाः ग्वाहालि पुचः तोखाया प्राविधिक ग्वाहालिइ उगु तालिम शुरु जूगु खः ।
तोखा नगरपालिका ३ वडाअध्यक्ष रमेश डंगोलं तालिमया उलेज्या यासें नेपालभाषालिसें तोखाया स्थानीय कला, संस्कृति, सम्पदा संरक्षण व प्रवद्र्धन यायेगु ल्याखं नेपालभाषाया माध्यमं हे स्थानीय पाठ्यक्रम अध्ययन अध्यापन याकेगु ज्याय् न्ह्याबलें नं थःपिनिगु ग्वाहालि दयाच्वनी धयादिल ।
नेपाःया संविधान प्रदत्त भाषिक अधिकारया प्रयोग यासें भाषा संरक्षण अभियानय् नगरया २ व ३ वडाय् दुगु विद्यालययात स्थानीय पाठ्यक्रम अध्ययन अध्यापन याकेत इनाप यासें थःपिनिगु थ्व हे कार्यकालय् च्यागू तगिं तक नेपालभाषा कक्षा अनिवार्य लागू यायेगु प्रतिवद्धता नं प्वंकादिल ।
शिक्षा शाखाया प्रमुख बाबुराम गौतमं नगरपालिकाया कार्यपालिकाया निर्णयकथं थौंकन्हय् येँ महानगरपालिकां लागू याःगु पाठ्यक्रम हे ब्वंकेगु यानाच्वनागु जानकारी बियादिल । वय्कलं स्थानीय भाय्या पाठ्यक्रम अध्ययन अध्यापन याकेत शिक्षण सहायकया नं तयारी यानाः आवश्यककथं पाठ्यक्रम तयार यायेगु ज्या नं जुयाच्वंगु जानकारी बियादिल ।
मातृभाषा संरक्षण अभियानया संयोजक श्रीकृष्ण मानन्धरं स्थानीय सरकारं थःगु क्षेत्राधिकार दुनेया दक्वं ब्वनेकुथिइ अनिवार्य रुपं स्थानीय मातृभाषाया पाठ्यक्रम लागू याना यंकेमाःगु व उकिया निंतिं कडा नीति हे दयेकाः वनेमाःगु खँय् बः बियादिल ।
उलेज्याझ्वलय् मातृभाषा शिक्षाया अभियन्ता नापं नेवाः वस्ती नेवाः स्कुल अभियानया संयोजक दीपक तुलाधर, तोखा सांस्कृतिक संरक्षण क्षेत्र विकास समितिय अध्यक्ष गणेशमान श्रेष्ठ, डिबान स्कुलया प्रधानाध्यापक नारायण पन्थीपिंसं थःथःगु नुगःखँ तयादीगु खः ।
LEAVE YOUR COMMENTS