सेक्स एलर्जीं दुःख मबीमा !

हालय् जूगु चुनावया लिच्वःयात कयाः विद्वान, विशेषज्ञतय् विश्लेषण न्यने । मती वइ । विश्लेषकत धइपिं विज्ञ जुइ । धुरन्धर विद्वान जुइ । इमिगु विश्लेषण न्यनाः जनतां यक्व खँ सीके सयेके फइ । जनता सुशिक्षित जुइ । जनताया निर्णय यायेगु क्षमताय् वृद्धि जुइ । विवेकशीलता परिमार्जित जुइ । तर । विडम्बना विश्लेषक धाःपिं नं अप्वःथें ताक्सिं वैद्य खनेदइ । झाँक्रीत थें । थःथःगु डम्पूm जक थाइपिं । विश्लेषकतय् खँ न्यने । छम्हेसिनं छता धाइ । मेम्हसिनं मेता । हाकनं मेम्हसिनं झन मेगु हे । सकसिनं थःथःगु तर्कय् दम दुगु दावा याइ । तर । न्यने । सरल न्ह्यपु । झन् स्वत्तु स्वयेका बी । ल्वाकःबाकः याइ विचाःत । क्वाःघासा थें । खिचडी थें । राजनीतिक विश्लेषकतय् खँ न्यने । थःगु न्ह्यपु तिख्खर याये । जायेके । सोचविचाः फुक्क भंग जुइ ।

अय्नं बुंगाःचाय् लः लुया वइथें । थःगु न्ह्यपुइ सहजरुपं छुं छुं विचाःत लुया वयाच्वनी । विश्लेषण मखु । देशय् खने दयाच्वंगु राजनीतिक परिस्थिति विषय सामान्य प्रतिक्रिया जुयाः लुया वयाच्वनी । बुया वयाच्वनी । विज्ञ जुयाः मखु । लाटा हिसाबं पिहां वःगु छुं छुं निष्कर्षत व्यक्त याये माःथें च्वनी । छम्ह सामान्य जनतां याये फइगु थुलि हे ला खःनि । देशय् जूगु चुनावय् वाम गठबन्धनं शानदार विजय प्राप्त या । वाम गठबन्धन धायेबलय् एमाले व माओवादी केन्द्रया गठबन्धन । एकता जुइगु आश्वासन बियाः जनताय् वनी । खतुं एकताया प्रक्रिया सम्पन्न मजूनि । तर । धाइ । एकता जुइगु अवश्यम्भावी ।

वाम गठबन्धनयात प्राप्त जनमतया मू आधार हे खः थ्व एकताया आश्वासन । वाम एकताय् आश्वासनं जनता गाक्कं उत्साहित जुइ । वाम एकतावादी पक्षधर त्याइ । मेखेर । प्रजातन्त्रवादीत शेरबहादुर देउवाया नेतृत्वय् जनताय् वइ । ‘ज्योतिषं जितः न्ह्य्क्वः प्रधानमन्त्री जुइ धाःगु । उकिं छिकपिनि मतप्रति जि धुक्क । जिगु नेतृत्वय् कांग्रेसं बहुमत काइ ।’ ज्योतिषया भविष्यवाण्ी न्ह्यब्वयाः देउवां राजनीति म्हिती । सिद्धान्त, कार्यक्रम छु छु खः ? मतलब तइमखु । जनतायात ज्योतिषया भविष्यवाणीया भरय् कचिकं नयेत स्वइ । जनतां ल्वाप्पा नकी । शेरबहादुर चुनावय् अंगलय् न्याः वनी ।

तुलनात्मक रुपय् वाम गठबन्धनया वाम एकताया नारा आकर्षक खनेदइ । जनताया बहुतमत थ्वं साली । आः वइगु सरकार वाम गठबन्धनया जुइ । देशय् संक्रमणकालया अन्त्य जुइ । स्थिर सरकार वइ । देशं आः राजनीतिक स्थायीत्व काइ । आर्थिक समृद्धिया लँय् ‘क्वीक मार्च’ याइ । वाम गठबन्धनया पक्षधरत उत्साहित जुइ । खः, आः वाम गठबन्धनं वाम एकता सम्पन्न यानाः स्थिर व स्थायी सरकार बी फुसा देय् न्ह्याःवनी । थहां वनी । आशा याये थाय् दइ ।

वाम गठबन्धनया रुपय् एमाले व माओवादी पाचिनाः चुनाव ल्वाइ । त्याइ । चुनावय् वाम गठबन्धनं वाम एकताया प्रण जनताया न्ह्यःने याःगु दु । चुनाव लिपा वाम एकता जुइ । जनता आश्वस्त जुयाः बहुमत बी । आः एमाले व माओवादीं थःथःगु दलत विघटन याइ । छगू हे दयेकी । दयेकेमाः । जनतां बिउगु मत वाम गठबन्धनयात जक मखु वाम एकतायात नं खः । उकिं निगू वाम दलतसें एकताय् प्रवेश मयाःतले जनताया न्ह्यःने इमिसं याःगु प्रतिज्ञा अपूर्ण जुइ । जनमतया हूबहू कदर याःगु ठहर जुइमखु । तर । वाम गठबन्धनयात वाम एकता यायेगु खँ ‘नया बजि’ जुयाच्वंगु दु ला धइथें च्वं ।

वाम एकता धइगु निकू भ्वं स्वायेथें मखु । लः व दुरु ल्वाक छ्याये थें मखु । एकताया मंकाः वैज्ञानिक आधार छु जुइ ? मंकाः वैचारिक आधार थनेत थःथःगु पूर्व सैद्धान्तिक मान्यतायात छु याइ ? गुलि त्वःतेगु ? गुकथं सम्झौताय् वयेगु ? थ्व गथः मफ्यंकं एकता म्हुतुं धायेथें सम्भव जुइ मखु । वाम एकता धइगु पिनेया थल जक खः । थलं भौतिक संरचनाया अनुभव बी । तर जबतक वाम एकताया थलय् मंकाः वैचारिक, सैद्धान्तिक सोच अन्तरवस्तुया रुपय् खने दइ मखु । तब तक वाम एकता ख्वला जक जुइ । आडम्बर जक जुइ । प्वंगु खालिगु थलबल थें जक जुइ । एमाले व माओवादी दथुइ मंकाः वैचारिक आधारया निंतिं अभ्यास जुयाच्वंगु खनेदु । एमालें ‘जबज’ त्वःतेमाः । माओवादीं ‘माओवाद’ त्वःतेमाः । थज्याःगु सुझाव नं वःगु दु ।

चुनावय् जनतां वाम गठबन्धनयात भोट कुर्कूगुया आधार ‘जबज’ नं खः, ‘माओवाद’ नं खः । अथे हे माक्र्सवादया नातां नं वाम एकतायात भोट कुर्कूपिं दइ । अथे हे शोषित वर्गया मुक्तिदाताया रुपय् नं वाम एकतायात ल्यःपिं दइ । वाम गठबन्धनया विजयया लिउने विविध वाम वैचारिक आधारत दइ । आः वाम एकताया नामय् लुइगु मंकाः वैचारिक आधारयात बहुमतं अनुमोदित खः धकाः गथे स्वीकार यायेगु ? वाम गठबनधनं वंगु चुनावय् थःगु एकताया मंकाः वैचारिक आधार ‘थ्व थ्व जुइ’ धकाः छाय् मत कायेत मस्वल ? छाय् वाम एकताया खालिगु नारा, मंकाः विचार शून्य थल संकाः भोट फ्वन ? आः वयाः ।

वाम एकता धइगु ‘पानडोराज बक्स’ थें छाय् जुल ? छाय् जनमतयात अन्यौलय् लाकल ? एकताया नारा खोल जक जुइ । महत्व वैचारिक अन्तर्वस्तुया जुइ । आः वइगु वाम एकताया वैचारिक आधार बहुमत जनतापाखें अनुमोदित धकाः गथे धायेगु ? थौंकन्हय् प्रमय् फँसे जुइपिंसं हाकनं मेम्हेसित ‘प्राण’ धाइ । छम्ह छधी खंकी । जन्मजन्मान्तर छम्ह ेह जुइ । प्रण याइ । तर प्रेमय् गबलें गबलें मनं मखंगु विघ्न जुइयः । ‘सेक्स एलर्जी’ । निम्हतिपू दथुइ सेक्स एलर्जीया समस्या दत कि सहवासं जलन हयाबी । पीडा थनाबी । प्रेम दयां जक मजिउ । हि मिले मजुल कि, एलर्जी जुल कि प्रेम पीडाय् परिणत जुइ । वाम एकताया ‘प्रेम विजय’य् सेक्स एलर्जीं दुःख मबीमा । सुभाय्