केरुङ रेलमार्गया ज्या न्ह्याइन
सम्भाव्यता अध्ययनया सम्पूर्ण खर्च चीनं व्यहोरे याइगु
येँ – ताःई न्ह्यवंनिसें चर्चाय् वयाच्वंगु चीनया केरुङ व नेपाःया येँदेय् स्वाइगु रेल मार्ग निर्माणया सम्भावना अध्ययनया ज्या न्ह्याइगु निश्चित जूगु दु । थौंकन्हय् नेपाः वयाच्वंगु चिनियाँ पुचलं नेपाः सरकारलिसे नकतिनि याःगु वार्तापाखें आः सम्भाव्यता अध्ययन ज्या न्ह्याका हे छ्वयेगु सहमति याःगु खः ।
नेपाली पक्षं धाः कथं चिनियाँ पुचलं आः छन्हु निन्हुया दुने हे थ्व ज्या न्ह्याकीगु सम्भावना दु । थौंकन्हय् नेपाः वयाच्वंगु थ्व चिनियाँ पुचः मेगु महिनाय् जक नेपाः वयेगु ज्याझ्वः दुगु खः । तर उपिं लछि न्ह्यः हे नेपाः वयाः सम्भाव्यता अध्ययन न्ह्याकेगु धकाः सहमति याःगुलिं उपिं उखेंनिसें हे पूरा तयारी यानाः वःगु खनेदु धाःगु दु ।
चिनियाँ राष्ट्रपति सी चिनपिङ नेपाः भ्रमण यानाः लिहां वनेवं चिनियाँ पक्ष केरुङ–काठमाडौं रेलमार्ग दयेकेगु ज्याय् अझ हथाय्चाःगु खनेदुगु खँ नेपाली पक्षं धाःगु दु ।सम्भाव्यता अध्ययनया ज्या आः याकनं हे न्ह्याकूसां थ्व गबले क्वचाइ धइगु खँ धाःसा चिनियाँ पक्षं स्पष्ट मयाःनि । थ्व तसकं थाकुगु रेलमार्ग जुइगु व थुकिया दथुइ आपालं सुरुङ समेत दयेकेमाःगु जुयाः ज्या क्वचायेत छुं भचा अप्वः ई काये फुगु खँ नेपाली पक्षं धाःगु दु ।
थ्व सम्भाव्यता अध्ययनय् तुइगु सम्पूर्ण खर्च धाःसा चीनं हे व्यहोरे याइगु जूगु दु । लिसें कन्हय् रेल सञ्चालन जुल धाःसा उकी ज्या याइपिं मनूतय्त तालिम बीगु व आखः ब्वंकेगु ज्या समेत चीनं हे याना बी धकाः बचं वःगु खँ नं धाःगु दु ।
तर थ्व रेलमार्ग दयेकेत तुइगु खर्च गनं वइ धइगु खँ धाःसा आः तकं स्पष्ट जूगु मदुनि । चिनियाँ पुचलं येँनं पोखरा तक व पोखरां हानं लुम्बिनी तक वनीगु रेलमार्गया सम्भाव्यता अध्ययन क्वचायेकाः उकिया रिपोर्ट नेपाःयात लःल्हाःगु दु ।
सिगात्से–केरुङ रेल नं नापनापं
केरुङ–काठमाडौं रेलमार्गया सम्भाव्यता अध्ययनया नापनापं चीनं सिगात्सेनिसें केरुङ तक वइगु रेलमार्ग निर्माणया ज्या नं न्ह्याकीगु खँ धाःगु दु । चीनं राजधानी बेइजिङं वइगु रेल सिगात्से तक थ्यंका तयेधुंकूगु दु । आः सिगात्सें केरुङ तकया रेल मार्ग नं दयेकेगु वयागु ग्वसाः दु । सिगात्सें केरुङ तकया लँपु ५०० किलोमिटर ताःहाकः ।
वहे रेल केरुङं येँय् तक हयेगु चीनया ग्वसाः खः । केरुङ–काठमाडौंया दुरी १०० किलोमिटर जक दु । केरुङं येँय् वयेगु दुरी उलि तापाः मजूसां थ्व क्षेत्र तसकं उच्च हिमाली क्षेत्रय् लाःगुलिं अन रेल मार्ग दयेकेगु ज्या धाःसा तसकं कठिन जुइगु खँ धाःगु दु ।
LEAVE YOUR COMMENTS