किजापुजाया चिकंमन्दः
पुष्परत्न ताम्राकार स्वीटहर्ट
थौं किजापुजा । शोभा लसतां जायाच्वंगु थाःगाः हे मदु । व तसकं लय्तायाः थःत लिमलाका जुल । लिमलाका मजुइगु नं गनं ? न्यादँ न्यादँ तक अमेरिका वनाच्वंम्ह वया याकःकिजा सौरभ बल्लं थौं छँेय् लिथ्यनीगु । न्यादँ न्यादँ मछि किजा दयां नं किजापुजा याये मखंकाच्वंम्ह शोभायात थुगुसी बल्लं किजापुजा यायेखनेत्यंबलय् लय्ताइगु ला स्वाभाविक हे जुल ।
ख नं खः, न्यादँ तक ला थः किजा सौरभ थः नापं मदुगुलिं जिन्दगी हे झिझांमिझां दंकाः शोभां कर्पिनि किजापुजा याःगु व यानावःपिं किजापिंत स्वयाः मिखा जायेक ख्वबि तयाः नुगः मछिंका सौरभया किपा जक स्वयाः लुमंकुसें लुधंका वयाच्वंगु खः । उकिं न्यादँ लिपा सौरभ वइगु जूगुलिं शोभां थौं सुथन्हापां दनाः छेँ छखां सुचिनिचि यानाः सुचुकुचु यासें छेँयात अझ अप्वः झःझः धायेकेत कुतः यानाजुल ।
अले अनं लिपा किजापुजायात माःमाःगु दक्व हलंज्वलं ताःलाके धुंकाः मन्दः च्वयेगु ज्या नं न्ह्याकल । न्हिनसिया स्वताः प्यताः इलय् ति थ्यनीगु खबर न्यनाः शोभाया ख्वाः चकं । अले वयागु मन चचं धायाः झंगः ब्वः थें उखेंथुखें ब्वयाच्वन ।मन्दःया ज्या दक्वं क्वचायेवं ख्येँय् सगंया ज्वलंनिसें कयाः धकि छपातय् तःसि, स्यांगुलि, ख्वःसिं, चाकुसि आदि माःमाःगु सिसाबुसा तयाः तःसिब्व नं तयार यात ।
अले उगु तःसिब्वया द्यःने क्वखा, ग्वय्स्वांमाः, चिग्वःग्वय्, झिलिमिलि स्वांमाः, ह्याउँगु लालुपाते स्वां नं झःझः धायेक छाय्पिइ धुंकाः याउँक हाकनं छकः छझाः झासु लनेत झ्यालं स्वःवन । उलिमछि दिपाः मकासे सनाजुलं नं भ्याःभचा हे त्यानु मचाः शोभां । थुकिया मू हुनि खः याकः किजा सौरभ थ्यंकः वइगु खबर ।
धायेवं झ्यालं हे दुपिनाः अमेरिकां वइम्ह किजायात लसकुस यानाः दुचायेकेत थः नं बांलाक वसतं पुनाः समाःसिमाः यानाः छाय्पिल । अथें हे बांलाःम्ह शोभा, बांलाक छाय्पिउबलय् उर्बशी, मेनका, तिलोतमाया सिबें बांलात । छाय्पी धुंकाः हाकनं सौरभ वइगु लँपुइ यानंनिसें मिखा ब्वयेकाः पियाच्वन ।
ई झंझं बिना वनाच्वन । थःम्हेस्यां याना तयेमाःगु ज्या दक्वं क्वचाल । सौरभ थ्यनी थे थ्यनी थें जक जुयाः थ्यंगु हे मखुनि । पिने वं खनाच्वन गुम्हं किजापुजा यायेत वनाच्वंपिं किजापिं, ततापिं अले गुम्हं ह्याउँक सिन्हः तिनाः ग्वय् स्वांमाः व झिलिमिलि स्वांमाः क्वखायाः झःझः धायेक किजापुजा याये क्वचायेकाः वयाच्वंपिं ।
‘तिरिङ…तिरिङ… तिरिङ… तिरिङ…’ आकाझाकां थारा हे न्हुइ यांसःया गं न्यात । यांसः ल्ह्वने ला मल्ह्वने ला शोभा अन्तरद्वन्द्वय् तक्यन । उगु न्याःगु गंया सलं शोभा तसकं ग्यात । मन धुकधुक मिनावल । म्हुतुसि सुखू गनावन । पिलाक्व नं खानावल ।
थुगु लुं शोभायात नं सौरभयात याकनं छेँय् लिथ्यंके हथाय् जुल । तर धोब्यायात हथाय् जुइवं चान्हय् निभाः त्वइ ला ? अथे हे धइथें शोभायात जुयाच्वन । न्यादँ न्यादँमछि बायाच्वने माःगुया लिपा बल्लं नापलानाः खँ ब्याकेगु दिं तायेकाः शोभाया मिखां मचायेक हे लसताया ख्वबि धाः हाया वयाच्वन ।
झ्यालय् च्वनाः सौरभया लँपु स्वया च्वंच्वं आय्बुयाः त्यानुया हे वयेधुंकल । सौरभया धाःसा अत्तापत्ता हे मदुनि । आशाया मत च्याकाः पियाच्वंम्ह शोभायात म्हाइपुया वल ला छु थें, न्ह्यःनेच्वंगु रेडिवा म्ये न्यनेगु ताःतुनाः चायेकल । भाग्यवशं ललेन्द्र शाक्यया च्वसां पिज्वःगु रिता महर्जनया सलं थ्वयाच्वंगु ग्वय्स्वां हनाः, मन्दः च्वयाः धाःगु म्ये वयाच्वन ।
छझाः व हे म्ये न्यनाः म्हाइपु छ्यायेत कुतः यानाच्वन । तर म्येँया अन्तिम अन्तिम झ्वलं धाःसा शोभायात तसकं ग्याकल । उकिं वं उगु म्ये पूवंक न्यने मफयाः रेडिवा बन्द यानाः नाःनाः रंगं मनय् धौबजि वायेकाच्वन । न्हिनय् स्वता प्यताः इलय् थ्यनीगु खबर वःसां न्याता त्याःई जुलं नं छुं खबर मवःनिगुलिं न्हाचः तकं लसतां भय् बियाच्वंगु शोभाया नुगः बुलुहुं बुलुहुं ग्याःचिकुं थियाहल ।
न्यनाच्वंगु म्येँया अन्तिम झ्वः नं अज्याःगु हे लानाच्वंबलय् वया ला छु याये गुगुयाये जुयाः मनय् अनेतनेगु खं थाय् काः वयाच्वन । अले मन नं पिपिच्याना वयाच्वन । इलं धाःसा धमाधम बिना वनाच्वंगु छुमां क्यँक्यं वनाच्वंबलय् शोभायात आः ला नैराश्यतां जाजां वनाच्वन ।
‘तिरिङ…तिरिङ… तिरिङ… तिरिङ…’ आकाझाकां थारा हे न्हुइ यांसःया गं न्यात ।
यांसः ल्ह्वने ला मल्ह्वने ला शोभा अन्तरद्वन्द्वय् तक्यन । उगु न्याःगु गंया सलं शोभा तसकं ग्यात । मन धुकधुक मिनावल । म्हुतुसि सुखू गनावन । पिलाक्व नं खानावल । ल्ह्वने ला मल्ह्वने ला जुयाः भतिचा दिपाः कयाच्वन । तर गं न्याःगु न्यानां तुं च्वने, न्यने हे मजिइक । धायेवं मन हिइकाः शोभां मग्याःगु मनं ‘सायद सौरभं यानाहःगु जुइमाः छाय् ग्यायेगु ?’ धकाः धयाच्वन ।
अले थःत थःम्हं कःघानाः ल्हाः थरथर खाकाः यांसः ल्ह्वन । ल्ह्वनाः थःगु सः हे थ्वयेके मलाःनि उखेपाखें ‘सौरभ फय्खःया झाकाय् लानाः मंत’ धाःगु सः थ्वल । थज्याःगु सः न्यनेवं शोभा आकासं कुतुंवःम्ह थें जुल । छझाः वं पत्याः यायेमफुत । वयात ला न्ह्यलय् ला ज्वलय् ला जुयाः न छसः ख्वयेफत, न चिल्लाय् दनाः हालेफत ।
व ला किंकर्तव्यविमूढ जुयाः त्वालाहां झुलय् जुयाः किजापुजाया चिकंमन्दलय् जक स्वयाच्वन । चिकं मन्दलय् च्याकातःगु मत पिलिपिलि च्यानाच्वन ।
LEAVE YOUR COMMENTS