गुकथं थुइकेगु शिक्षायात ?

पौभा डंगोल

छुं नं खँयात व्यावहारिक रुपय् हिउपाः (परिवर्तन) हयेगुयात हे शिक्षा धाइ । अरिस्टोटलया छगू धापू कथं छुं नं ज्ञानयात लागु यायेगु खः, गुगु थःगु इच्छा कथं समाजय् लागु जुइमा । अथे हे बौद्ध शिक्षा कथं थःत छुं नं लिच्वः मलाक छगू समाजय् भिंगु हिउपाः हयेगुयात हे शिक्षा धाइ ।

न्हापा न्हापा शिक्षा कायेत छम्ह ब्वनामि थःगु छेँ स्वयां यक्व तापाक वनाः थः गुरु वा गुरुमांयागु कुति (आश्रम)इ च्वनाः जक शिक्षा कायेगु चलन दुगु खः, गुकी ब्वनामिपिं थःगु छेँ, थःथिति व सकलें त्वःताः अन हे आश्रमय् च्वनाः पूवंक शिक्षा कायेमाः । अथे धायेबलय् उमिगु ब्वनेकुथि धयागु हे आश्रम खः ।

गन उमिसं अनया वातावरण छु दु व हे कथं ज्ञान कायेमाः । चाहे उमिगु इच्छा अःखः हे छाय् मजुइमा, उमिसं गुरुयागु हरेक खँ न्यनेमाः ।
न्हापा न्हापा बाह्रखरी ब्वनेत न्यादँ थ्यंकेमाः । आः थौंकन्हय् झिंच्याला दुम्ह मचां थःगु तोतेबोली न्ववानाच्वंगु इलय् हे खँग्वः न्ववायेफु । थ्व धयागु झीगु समाजय् शिक्षाया ख्यलय् वःगु छगू बांलाःगु हिउपाः खः ।

थ्व जक मखसे नेपाःया हे छगू पुलांगु शिक्षा पद्धतिइ अर्थात पुलांगु शैक्षिक ख्यलय् हे वःगु छगू हिउपाः खः । न्हापायागु शैक्षिक पद्धति घोके यानाः, कण्ठ यानाः व मस्तय्त ख्यानाः अर्थात छगू कथं टर्चर बियाः न्ह्यानावःगु खःसा वंगु छुं ई न्ह्यवं निसें छगू न्हूगु शैली व ढाँचां शैक्षिक गतिविधि न्ह्याका वयाच्वंगु दु ।

थ्वहे न्हूगु गतिविधिलय् झीसं झीगु शरीरया पञ्चइन्द्रीय छ्यलाः अथे धयागु स्वयाः, न्यनाः, थियाः, महसुस यानाः सवाः कयाः ब्वंकेगु पद्धति न्ह्याका वयाच्वंगु दु, गुकिं मस्तय्गु शैक्षिक विकासयात उमिगु मानसिक विकास नापनापं हंका स्वइ । थ्व पद्धतिइ learning with fun य् छगू अवधारणाय् आधारित दु ।

दिमागी बोझ बिना हे म्हितकाः, न्ह्यइपुकाः बाय् क्यनाः मस्तय्त उमिगु मस्तिष्क विकासय् तिबः बीगु थ्व पद्धतिइ मस्तय्त आखः ब्वनाः तःधंम्ह मनू दयेकेगु स्वयां छम्ह बांलाःम्ह, भिंम्ह मनू, छम्ह समाजया गतिलाःम्ह ताःलाःम्ह अले न्ह्यागु हे समस्या वःसां ल्वायेफुम्ह, समस्या समाधान यायेफुम्ह मनू दयेकेगुली केन्द्रीत जुइ ।

थ्व हे पद्धतिइ मस्तय्त अब्बल व पूर्ण विकास जूम्ह छम्ह भिंम्ह मनू पिकायेगु खः ।थौंकन्हय् झीगु समाजय् मनूतय् अथे तसकं लिमलाः। अले मस्तय् निंतिं ई तकं पिकायेमफु बाय् ई बीमखु । अथे जुयाः थ्व हे पद्धतिइ Personal attention अग्रस्थानय् लाः । अथे हरेक मस्तय्सं थःगु छेँयागु वातावरण नाप नापं लुमुगु (क्वातुगु) माया व थः नालाकायेत महसुस यायेफइ ।

थुलि जक मखसे हरेक नखःचखः, भेषभुषा सयेकाः सिइकाः थःगु संस्कारप्रति छगू जिम्मेवार महसुस यायेफइ । आः थ्व ला जुल थौंकन्हय् ब्वनेकुथिइ गथे यानाः मस्तय्त ब्वंकेगु बाय् ब्वंकाच्वंगु धयागु बारे । आः मस्तय्त थःगु छेँय् गथे यानाः आखः म्हसिकाबीगु बाय् गथे यानाः धायेगु बारे नं सिइके ।

– ब्वनेकुथिया जक भर मकासे मस्तय्त छेँय् नं उमिगु इच्छा, रुचि छु दु धकाः थुइकाः ध्यान बियाः जक व हे कथं कुतः याकेमाः ।

– मस्तय्गु क्षमता स्वयाः जक व हे कथं टिभी बाय् युट्युब क्यनेमाः । व जक मखुसे पिने पिने जुइगु ज्याझ्वलय् नं ब्वति कायेकेबीमाः ।

– मस्तय्त गल्ती याकाः व ख्यानाः मखुसे छक्वःनिक्वः बदमासी याःसां सह यानाः उमित थःथम्हं तुं महसुस याके बीमाः ।

– गल्ति हाकनं हाकनं दोहरे याःसा उपिं प्रति झीपिं न्ह्याबलें चनाखो जुयाः च्वनेमाः ।

– छेँय् बियाहःगु ज्या (होमवर्क) गुकिं ब्वनेगु बाय् च्वयेगु ज्याय् उमित गुबलें गुबलें स्याबास बाय् छुं रिवार्ड बियाः नं तिबः बिइफइ ।

सम्बन्धित बुखँ

LEAVE YOUR COMMENTS