त्रिचन्द्र दयेकेत प्रदर्शन

येँ (नेपालभाषा टाइम्स)÷त्रिचन्द्र क्याम्पस पुनर्निर्माण यायेमाःगु माग यासें नेपाल विद्यार्थी संघं प्रदर्शन याःगु दु । म्हिगः सुथय् क्याम्पस न्ह्यःने प्रदर्शन यासें विद्यार्थीतय्सं घन्टाघरपाखेया भवन जीर्ण जूगु व अन ब्वनीपिं विद्यार्थीत छेँ दुना वयाः थःपिंत ल्हाइगु जकं खः लाकि धइगु ग्याःचिकु ज्वनाः कक्षाय् च्वंच्वनेमाःगु अवस्था वयाच्वंगु खँ धाःगु दु ।

उकथं हे विद्यार्थीतय्सं पुनर्निर्माण प्राधिकरण, शिक्षा मन्त्रालय व पुरातत्व विभागयात जीर्ण भवनया बारे जानकारी याकेधुनागु खःसां नं उकिया सुनुवाइ मजुइवं विरोधय् कुहां वयेमाःगु खँ नं धाःगु दु ।

प्लेकार्ड सहित विरोधय् कुहां वःपिं विद्यार्थीतय्सं
‘प्रधानमन्त्रीजु, छिं ब्वनागु कलेज गबलय् दयेकेगु, शिक्षा मन्त्रालय तंगु सुचं, सेभ त्रिचन्द्र, इतिहास क्वःदलेत्यंगु दु, सरकार मौन दु’ धइगु नारा थ्वयेकूगु खः ।