महानगरया लाछिखिचातय् बन्ध्याकरण

येँ महानगरपालिकां थःगु हरेक वडाय् न्यनाच्वंपिं लाछिखिचा नियन्त्रण व व्यवस्थापनया निंतिं मानवीय तरिकां महानगरीय खिचा व्यवस्थापन ज्याझ्वः (मनुमित्र) मार्फछ च्याद्वलं मल्याक खिचाया बन्ध्याकरण यायेधुंकूगु दु । येँ मनपां स्वदँ न्ह्यः न्ह्याकूगु थ्व ज्याझ्वः अन्तर्गत समाजय् अझ थुकथं न्यनाच्वंपिं खुद्वः खिचाया बन्ध्याकरण याये ल्यं दनि ।

यलय् च्वनाः छेँय् लहिनातःपिं व जंगली जनावरया हक हितय् ज्या याना वयाच्वंगु व थौंकन्हय् विश्वया ३० गू देशय् ज्या याना वयाच्वंगु संस्था ‘द जेन गुडअल इन्ष्टिच्युट नेपाल’या प्राविधिक ग्वाहालिइ मुनमित्रं याःगु सर्वेक्षणकथं येँय् जक थौंकन्हय् २२ द्वः लाछिखिचा दु ।

‘जिमिसं सन् २०१६ य् थ्व सर्वेक्षण यानागु खः’ मनुमित्र ज्याझ्वःया संयोजक संगीता सापकोटां धयादिल, ‘२२द्वः थज्याःपिं खिचामध्ये मुक्कं १४ द्वः खिचाया बन्ध्याकरण यायेमाःगु खः, च्याद्वः खिचाया बन्ध्याकरण यायेधुंगु दुसा खुद्वःया अझं याये ल्यं दनि ।’

नीनिद्वःमध्ये च्याद्वः लाछिखिचाय छुं बुरा जुइधुंकूगु, छुं छुं खिचा मस्तय् दुरु त्वंकाच्वंपिं जूगु व छुं छुं मस्त हे जूगुलिं इमित बन्ध्याकरण याये मिले मजूगु सापकोटां धयादिल । येँय् अप्वया वनाच्वंगु लाछिखिचातय् कारणं दुहां वःगु ल्वचं मनूतय्त छुं नं कथंया लिच्वः मलायेमा धकाः मनुमत्रिं ८० प्रतिशत अज्याःपिं खिचायात रेबिज विरुद्धया खोप बीधुंगु मनुमित्रया सामुदायिक ज्याझ्वः संयोजक वसन्त गौतमं जानकारी बियादिल ।

मनुमित्रं वंगु वाःया शुक्रवाः जक थःगु क्लिनिकय् यंकाः अज्याःपिं खिचातय् बन्ध्याकरण यानाः ‘भी’ आकारय् न्हापं चानाः चिं तया बीगु यानाच्वंगु दु । वि.सं. २०७३य् द जेन गुडअल इन्ष्टिच्युट नेपालं लाछिखिचाया व्यवस्थापनय् लगानी याःगु खः । वि.सं. २०७४ य् येँ महानगरपालिकां ७२ गू लाखया वासः न्याना बिउगु खः ।

थुकथं हे ०७६ सालय् नं येँ मनपां न्यय्गू लाख ग्वाहालि यायेगु प्रतिवद्धता व्यक्त याःगु मनुमित्रया संयोजक सापकोटां कनादिल । मनुमित्रं येँ मनपाया दक्वं वडाय् पशु व्यवस्थापन सहायक पुचः गठन यानाः स्वीम्ह दुजःसहित २, ३ , १३ व १४ बाहेकया दक्वं वडाय् दुपिं अज्याःपिं खिचाया बन्ध्याकरणया ज्या क्वचायेकेधुंकूगु दु ।

मनुमित्रं लाछिखिचा सम्बन्धी नीति निर्माण यायेमाःगु आवश्यक दुगु खँ धाःगु दु । हरेक प्रकारया खिचाया आयु १२ दँ निसें १५ दँ जुइगुलिं मनुमित्रं समाजय् रेबिज शिक्षाया ज्याझ्वः, विद्यालय शिक्षा ज्याझ्वः लगायतया थीथी ज्याझ्वः याना वयाच्वंगु दु ।

मनुमित्रं महानगरपालिकालिसे याःगु स्वदँतकया सहकार्य थौंकन्हय् लिपांगु चरणय् दुगुलिं उकिया समाप्तिलिसें समाजय् दुपिं अज्याःपिं खिचाया सुसाःकुसाः सुनां याइ धइगु चिउताः ज्याझ्वलय् सहभागितय्त जुयाच्वंगु दु । थ्व ज्याझ्वः मात्र येँय् जक न्ह्याकूगु खः । थ्व ज्याझ्वःया कारणं थःगु छेँय् खिचा लहिनातःपिं मनूततकं सचेत जूगु खँ धाःगु दु ।

सम्बन्धित बुखँ

LEAVE YOUR COMMENTS