छाय् हयेमफयाच्वन साझेदार

नेपाल टेलिकम व वायुसेवा निगम

येँ – नेपाल टेलिकम, नेपाल वायुसेवा निगम थेंज्याःगु सरकारी स्वामित्वय् दुगु कम्पनीइ विदेशी साझेदार हयेगु निंतिं कुतः जुयाच्वंगु ताःई दयेधुंकल । अथे खःसां सरकारं थुपिं निगुलिं संस्थाय् अझ नं साझेदार हयेफुगु मदुनि । निगम सुधार यायेगु निंतिं थीथी इलय् गठन याःगु समितितय्सं नं विदेशी साझेदार हयेत सुझाव बीगु यानाच्वंगु दु ।

छुं ई न्ह्यव जक गठन याःगु न्हूगु सुझाव समितिं असोज १ गते बुझ याःगु थःपिनि प्रतिवेदनय् नं विदेशी साझेदार हयेत सुझाव बियातःगु दु । संस्कृति तथा नागरिक उड्डयन मन्त्री योगेश भट्टराईयात बुझे याःगु प्रतिवेदनय् बजारीकरण व संचालन व्यवस्थानया अनुभव थुगु विदेशी कम्पनीयात हयेमाःगु सुझाव बियातःगु दु ।

थथे तःक्वः तक हे विदेशी साझेदार हयेत सुझाव बिउसां धाथें हये धाःसा मफयाच्वंगु छाय् ले ? थुकिया कारण सरकारया थःगु हे कमजोरी यानाः जूगु खँ विज्ञतय्सं धयाच्वंगु दु । सरकारी कमजोरीया कारणं हे विदेशी साझेदार हये मफयाच्वंगु बिचाः उमिगु दु ।सरकारं थःम्हं हे आःतक टेलिकम व वायुसेवा निगमय् साझेदार हयेगु निंतिं प्रक्रिया न्ह्याकूगु मदुनि ।

सार्वजनिक संस्थान निर्देशन बोर्डया अध्यक्ष विमल वाग्लें बिबिसीया लिसे खँ ल्हासें सरकारं रणनीतिक साझेदार हयेगु नीतिइ निरन्तरता मबिउगु खँ धयादी । ‘भतिचा तयारी यायेवं रणनीतिक साझेदार वइगु खँ मखु । विदेशय् वनाः छगू रोडशो याःगु भरय् रणनीतिक साझेदार वइ धकाः तायेके मजिउ’ वय्कलं धयादीगु दु ।

तर आः सरकारयाके नीतिगत निरन्तरता बीफइगु आधार दुगुलिं रणनीतिक साझेदार हयेत अःपुइगु तर्क वय्कःया दु । तर थ्व नं सरकारया इच्छाशक्ति निर्भर जुइगु खँ वय्कलं धयादी ।वय्कःया बिचाः कथं निगम व टेलिकम निथासं रणनीतिक साझेदार वइगु सम्भावना यक्व दु । ‘झीगु यक्व देय्लिसे हवाइमार्ग सम्बन्धी सम्झौता दुगुलिं व्यापार यायेत सहज जुइ ।

‘मन्त्रिपरिषदं निर्णय यानाः औपचारिक रुपं ज्या मन्ह्याकूतलय् रणनीतिक साझेदार हयेगु विषय गफय् जक सीमित जुइ’

उकिं वायुसेवा निगमय् रणनीतिक साझेदार वयेत इच्छुक यक्व दइ’ वय्कःया बिचाः दु ।मेखे नेपाःया सार्वजनिक संस्थानय् जुइगु तच्वःगु राजनीतिकरणया कारणं विदेशी साझेदार वयेत सहज मजूगु बिचाः नं छथ्वःसिया दु । पुलांम्ह कार्यवाहक महालेखापरीक्षक सुकदेव भट्टराई खत्रीं धयादी, ‘नेपाःया सार्वजनिक संस्थानय् राजनीतिक प्रभाव अप्वल, मन्त्रीतय् भर्तीकेन्द्र जुल ।

व्यवस्थापन खर्च अप्वयेकेगु ज्या जूगु द, अले उकिया हिसाब दँय्दसं बुझे यायेगु चलन नं मदु ।’वय्कः थज्याःगु समस्या ज्यंकेगु निंतिं नं रणनीतिक साझेदार आवश्यक दुगु तायेकादी । तर उकिया निंतिं मन्त्री व प्रधानमन्त्रीया मुख्य भूमिका दइगु वय्कःया तर्क दु ।

नेपाल टेलिकम व नेपाल वायुसेवा निगमया कार्यकारी प्रमुख जुयादीधुंकूम्ह सुगतरत्न कंसाकारं धाःसा मन्त्रिपरिषदं निर्णय यानाः औपचारिक रुपं ज्या मन्ह्याकूतलय् रणनीतिक साझेदार हयेगु विषय गफय् जक सीमित जुइगु बिचाः तयादी ।वय्कलं धयादी, ‘थ्व संस्थानं स्वयां नं सरकारं यायेगु ज्या खः ।

थ्व धयागु निजीकरणया ज्या खः । राजनीतिक इच्छाशक्ति हे मू खँ खः ।’वय्कलं निगुलिं संस्थाय् रणनीतिक साझेदार वयेत इच्छुकपिं दुगु खँ धयादी । छुं ई न्ह्यव जक जापानया छगू कम्पनीं टेलिकमय् साझेदार जूगु चाहे जुयाच्वंगु खँ सार्वजनिक जूगु खः । उकियात टेलिकमया अधिकारीतय्सं नं पुष्टि यायेधुंकूगु दु ।

उगु जापानी कम्पनीलिसे सञ्चार तथा सूचना प्रविधि मन्त्रालयय् प्रारम्भिक सहलह नं जूगु खँ धाःगु दु । टेलिकमं थःपिनिगु चलअचल सम्पत्ति सहितया साखबारे अध्ययन यानाः छगू प्रतिवेदन नं अर्थमन्त्रालयय् बुझे यायेधुंकूगु दु ।

वाग्लेया कथं आः टेलिकमय् रणनीतिक साझेदार हयेत नेपाल वायुसेवा निगमय् स्वयां सहज जुइगु खनेदु । छाय्धाःसां वायुसेवा निगमय् साझेदार हयेत दकलय् न्हापां वयात कम्पनीइ रुपान्तरण यायेमानि, तर टेलिकम धाःसा न्हापा हे कम्पनी जुइधुंकूगु दु ।

सम्बन्धित बुखँ

LEAVE YOUR COMMENTS