‘लगानी बोर्डयात समानान्तर सरकार कथं विकास यायेत्यनागु मदु’

येँ – अर्थमन्त्री युवराज खतिवडां लगानी बोर्डया चाकः तचाः यानाः कार्यक्षेत्र थप तब्या यासें पूर्वाधार विकास पाखें आर्थिक समृद्धि चूलाकेत ‘सार्वजनिक निजी साझेदारी तथा लगानी सम्बन्धी सम्बन्धय् व्यवस्था यायेत दयेकूगु विधेयक २०७५’ हयेमाःगु खँ धयादीगु दु । वय्कलं थ्व विधेयकं निजी ख्यःया पुँजी पूर्वाधार विकासय् लगानी यायेत लँपु चालीगु खँ धयादीगु दु ।

प्रतिनिधि सभाया अर्थ समितिया मंगलवाः जूगु बैठकय् न्ववासें अर्थ मन्त्री खतिवडां उच्च आर्थिक वृद्धिदर चूलाकेत ततःधंगु आयोजनाय् लगानी आवश्यक दुगु खँ धासें थ्व विधेयकपाखें विदेशी लगानीयात आकर्षित याःसां निजी क्षेत्रयात लिच्वः मलायगु खँ नं धयादीगु दु । वय्कलं लगानी बोर्ड राजनीतिक निकाय मजूगु व समानान्तर सरकारया रुपय् विकास यायेत्यनागु नं मखु धकाः स्पष्ट यानादीगु दु ।

थ्व विधेयकयात कयाः नीस्वम्ह सांसदतय्सं थीथी बुँदाय् संशोधन यायेमाःगु धासें संशोधन दर्ता यानातःगु दु । सरकारं लगानी बोर्ड पाखें पूर्वाधार विकासय् तःधंगु लगानी दुत हयाः विकास व आर्थिक समृद्ध चूलाकेगु धकाः थ्व विधेयक हःगु खः । थ्व विधेयकय् विशेष यानाः लगानी बोर्ड चाकः तचाः यानाः कार्य क्षेत्र तब्या यायेगु प्रस्ताव तयातःगु दु ।

लगानी बोर्ड ऐन २०६८ व्यावहारिक रुपं कार्यान्वयनय् मवःगुलिं सरकारं थ्व न्हूगु विधेयक हयेत्यंगु खः ।न्हूगु विधेयकं ६ अर्ब स्वयां च्वय्या पुँजी सार्वजनिक निजी अवधारणा कथं परिचालन याइगु जुइ । अर्थ मन्त्रालयया कथं ९ प्रतिशत तकया आर्थिक वृद्धिदर चूलाकेत १५ खर्ब पुँजी परिचालन आवश्यक दु ।

थौंकन्हय् निजी ख्यःलिसे जानाः मुक्कं झिगू खर्ब जक पूँजी परिचालन यायेगु क्षमता दु । बैठकय् कंग्रेसया सांसद गगन थापां प्रधानमन्त्रीया अध्यक्षताय् गठन जुइगु लगानी बोर्डय् प्रतिपक्षी दलया नेतायात नं दुथ्याकेमाःगु माग यानादीगु खः ।