चाबही गणेद्यःया देगः अलपत्र

येँ – भुखाचं क्षतिग्रस्त जूगु चाबही गणेद्यः (चन्द्र विनायक) या पुनर्निर्माण अलपत्र जूगु दु । पशुपति क्षेत्र दुने लाःगु थ्व देगःया पुनर्निर्माण यायेगु अवधि सिधयाः मेगु स्वला थपे याना बिउगु खःसा थ्व थपे याःगु ई क्वचायेत्यनं नं दिनाच्वंगु ज्या धाःसा शुरु जूगु मदुनि । वंगु असार मसान्तय् पुनःनिर्माण सिधयेमाःगु खःसां आः बछि ज्या हे सिमधःनि ।

निर्माण व्यवसायी व थुकिया सरोकाराला निकायत मिले जुयाः ज्या अलपत्र याःगु द्वपं स्थानीय मनूतय्सं बिया हःगु दु । दुगः पुनःनिर्माणया लागि राष्ट्रिय पुनःनिर्माण प्राधिकरणया आर्थिक ग्वाहालिइ पशुपति क्षेत्र विकास कोषं ठेक्का बिउगु खः । पुनःनिर्माण अलपत्र जुयाः मंगलवाःपतिकं देगलय् पुजा व दर्शनया लागिं वइपिं दर्शनार्थीत प्रभावित जुयाच्वंगु दु ।

स्वनिगःया प्यम्ह गणेद्यः मध्ये छम्ह जुयाच्वंम्ह चाबही गणेद्यः पशुपति क्षेत्रया हे छगू महत्वपूर्ण सम्पदा खः । १ करोड ४३ लाख ४१ हजार १६० तकाया लागतय् श्री पिआर कन्स्ट्रक्सन प्रालीं देगः पुनःनिर्माणया ठेक्का लाकूगु खः । पशुपति विकास कोषया निर्देशक भरत मरासिनीं धाःसा पुरातत्व विभागया सुझाव कथं न्हूगु सिँइ बुट्टा कीमाःगु जुयाः ज्या लिबाःगु खँ राससयात कनादीगु दु ।

सम्बन्धित बुखँ

LEAVE YOUR COMMENTS