मिश्रीया थीथी वासः

मिश्रीयात अंंग्रेजीं ‘रक सुगर’ नं धाः । धाथें ला चिनिया ख्वयाच्वंगु कणयात हे मिश्री धाइगु खः । बजारय् ल्वहं थें धीचिंगु व चिचिकुक कुचाकुचागु अथवा गुगुं नं आकारयागु मिश्री न्यायेगु दु । थ्व न्ह्यागु हे आकारयागु जूसां चिनि स्वयां बेस हे जुइ । थुकिया सेवनं छिगु कथु उलिउलि मिनीगु व हिइसे च्वनीगु छतिं हे मजुसे याउँसे च्वनी । सुख्खा मुसु मवयेकेत नं मिश्रीं ज्या बिउ ।

आः थुकियात छु छु वासः कथं छ्यले जिउ व स्वये —
# मिश्रींचुं व सोंपचुं उलि उलि हे मात्राय् कयाः उकी सवाः साकेत सुकुमेलचुं भचा ल्वाकछ्यानाः न्हिं निक्वः दुरुलिसे निगू निगू चम्चा सेवन यात धाःसा मिखा कमजोर जूगुलिं यानाः छ्यं स्याःगु लनावनी ।

# कब्जियतं यानाः छ्यं स्यात धाःसा इसबगोल निगू चम्चा बागू गिलास लखय् खुघौ तक फ्वयादिसँ । अनंलि थुलि हे मिश्रीचुं फ्वयातःगु ईसबगोलय् ल्वाकछ्यानाः त्वनाबिल धाःसा प्वाः सफा जुइ, अले कब्जियतं यानाः छ्यं स्यानाच्वंगु लनावनी ।

# चिधिकःपिं मस्तय्त सर्दीं यानाः मुसु वल धाःसा लखय् मिश्री तयाः त्वंकादिसँ, मुसु लनावनी ।

# मिश्री चाकुसे नं च्वनी, सिचुसे नं च्वनी । अथे जूगुलिं तसकं गर्मीं जुइबलय् चिनियागु थासय् मिश्री सर्बत दयेकेत छ्यलेगु यायेमाः । छगू गिलास लखय् माछि मिश्री तयाः त्वनाबिल धाःसा सिचुसे नं च्वनी, तागत नं दइ ।

# क्वाःगु दुरुइ केसर व मिश्री ल्वाकछ्यानाः त्वनाबिल धाःसा म्हय् तागत दयाः फुर्ति थहां वइ । लिसें म्हय् हीमोग्लोबिनया मात्रा नं अप्वयावइ, गुकिं यानाः छ्यंगुलिइ चमक दयावइ । थ्व दुरुं यौन कमजोरी नं मदयेकाबी ।

# मिश्री, सुकुमेल व मख्खन उति उति हे मात्राय् निनाः ल्वाकछ्यानाः न्हिछिया निक्वः नयाबिल धाःसा टन्सिलाइटिसय् फाइदा जुइ ।

# जा नयेधुंकाः सोंप व मिश्री नयेगु यायेमाः, छाय्कि छता ला थुकिं लाभा व मेमेगु मसलाया बास तंकी अले मेगु थुकी पाचनशक्ति नं बल्लाकी, गुकिं यानाः नयागु याकनं पचे जुइ ।

# मस्र्याबरां व मिश्री उति उति हे ल्वाकछ्यानाः सवाः साकेत सुकुमेल भचा निनाः न्हिं न्हिं सुथसिया इलय् स्वंगू स्वंगू चम्चा सेवन यात धाःसा मानसिक तनावया कारणं छ्यं स्याइगु ल्वय् न्ह्याक्व हे पुलां जुइ धुंकूसां नं लनावनी ।

# माउथ अल्सर लंकेगु खःसा मिश्री व सुकुमेल कम मात्राय् निनाः म्हुतुइ तयादिसँ, फाइदा जुइ ।

# साहा साहा स्याइगु जुयाच्वंसा अश्वगन्धा व मिश्री उति उति हे मात्राय् ल्वाकछ्यानाः छगू छगू चम्चा सुथय् व बहनी भ्वाःतिनाः क्वाःगु दुरु छगू गिलास त्वनाबीमाः ।

# साइनोसाइटिसया ल्वगिया छ्यं नं तसकं हे स्याइ । अथे जुइबलय् तुलसी झिंन्याहः, मलय् झिगः चिचिकूगु मिश्री झिकू व ५ ग्राम पालु छगू गिलास लखय् दायेकादिसँ । बछि लः सुपाः वनकि छानय् यानाः सुथय् खालि प्वाथय् क्वाः क्वाः हे त्वनादिसँ । थ्व त्वनेधुंकाः घौछि तक छुं हे भपादीमते ।

# न्हासि वल धाःसा मिश्री लखय् संकाः उकियात नतुनादिसँ, न्हासि वःगु दिनावनी ।

# मिसातय् थीमजिउ जुइबलय् यक्व अप्वः हि कुहां वइगु जुयाच्वन धाःसा मिश्री व मुलहठी उति उति हे मात्राय् निनाः बागू बागू चम्चा स्वक्वः ख्वाउँलःलिसें भ्वाःतिनादिसँ । थीमजिउ जुइबलय् अप्वः हि कुहां वयेगु दिनावनी । यदि गर्भपतनलिसे सम्बन्धित रक्तश्राव जूगु खःसा व नं बन्द जुयावनी ।

थीमजिउ जूगु दी धुंकाः नं भचा ताःई तक थ्व वासःया सेवन यानाच्वन धाःसा थ्व ल्वय् सदांया निंतिं लनावनी । गर्भपातया प्रवृत्तियापिं मिसातय्सं नं थ्व ताःई सेवन यानाच्वने जिउ, तर होस यानादिसँ, डाइबिटिज ल्वय् दुपिंसं मिश्री सेवन यायेमजिउ ।

एजेन्सीया ग्वाहालिं निरा महर्जन