ने. सं. ११४६ सिल्लाथ्व द्वादशी - शहिद दिवस

सक्रिय रोजिना

निलः साय्मि

‘जिगु वैंशं धाल जि ला ल्यासे जुयावल रे’
देविका प्रधानया थुगु म्येँया म्युजिक भिडियोय् बाँसुरी पुयाः हिसिचा दयेक न्ह्यःने दं वइम्ह कलाकार खः– रोजिना सुवाल । गुम्ह थौंकन्हय् नेपालभाषा कलाकारीता ख्यलय् छम्ह धिसिलाक्क न्ह्याः वयाच्वंगु दु ।‘भाय् हे मंत धाःसा थःगु म्हसीका तनी, उकिं थःगु म्हसीका ल्यंका तयेत थः मस्तय्त छेँ निसें थःगु भाय् ल्हाकेगु सुरु यायेमाः’ धयागु भावना दुम्ह रोजिनाया जन्म ख्वपया टौमढी त्वालय् जूगु खः ।

रोजिना गणेशकुमारी व पुण्यराज सुवालया कान्छिम्ह म्ह्याय् खः । झिदँ न्ह्यः कलाकारीता ख्यलय् पलाः तःम्ह रोजिना मचां निसें प्याखं ल्हुइगु सोख दुम्ह खः । रोजिनां न्हापां थःगु ब्वनेकुथिइ व ख्वपया थीथी सांस्कृतिक ज्याझ्वः व नेपालभाषा तःमुँज्याय् वनाः थःगु प्रतिभा न्ह्यब्वयेगु यात । तर रोजिनाया मां–अबुयात धाःसा न्हापा रोजिना कलाकारितापाखे वंगु मयः ।

कलाकारिता ख्यः धइगु बांलाःगु मखु, थः म्ह्याय् स्यनीगु जुल धकाः चिन्ता कयाच्वनीगु जुयाच्वन । उकिं थ्व ख्यलय् वनेम्वाः धकाः ब्वः नं बियाच्वनीगु जुयाच्वन । तर रोजिना धाःसा कलाख्यलय् तसकं नुगः क्वसाःम्ह जुयाच्वन । उकिं वयागु ब्वनेकुथिइ ९ व १० कक्षाया विद्यार्थीपिंत ब्वनेगु बाहेक अतिरिक्त क्रियाकलापय् छुकि हे ब्वति काये मदइगु नियम दयेकातःसां रोजिना छम्हेसित धाःसा बांलाक प्याखं हुलीम्ह जूगुलिं छुट बियातःगु जुयाच्वन ।

नेपाली म्यूजिक भिडियोपाखें थुगु क्षेत्रय् वःम्ह रोजिनां सुरज महर्जनया निर्देशनय् ‘मन जिगु स्यंका बिल ट्याक्सी ड्राइभरचां’ नांगु म्यूजिक भिडियोपाखें डेब्यु याःगु खःसा वं दकलय् न्हापां म्हितूगु संकिपा धाःसा ‘चन्द्रमान’ खः । भोगेन्द्र मानन्धरया ‘ग्यानपुस्टाल’य् इन्स्पेक्टरया भूमिकाय् ख्वपभासं न्ववानाः सकसियां नुगः सालेत ताःलाःम्ह रोजिना इमेज च्यानलय् वइगु ‘ख्वताबजि’ या लिसें नेपाली व नेपालभाषा यानाः थ्यंमथ्यं ३५ पु ति म्युजिक भिडियोय् खनेदयेकः वयेधुंकूगु दु ।

अथेहे खस नेपाली भाय्या निगू, नेपालभाषाया स्वंगू व चिहाकःगु प्यंगू संकिपाय् अभिनय् याये धुंकूगु दु । थौंकन्हय् देउराली जनता फर्मास्युटिकलय् मार्केटिड्डय् ज्या यानाच्वंम्ह रोजिना थौंकन्हय् नं म्युजिक भिडियो, संकिपाय् उलि हे सक्रिय जुयाच्वंगु दु । सुटिङयात ई मालीगु जूगुलिं विरामी जूसां तकं ज्याकुथिइ काचाक्क बिदा मकासे बिदा बचे यानाच्वनी ।

संकिपा ख्यलय् झिदँ न्ह्यः व आःया अवस्थाय् यक्व हे हिउपाः वयेधुंकूगु बिचाः दुम्ह रोजिनां धायेगु याः – ‘नेपाली भाय्या क्षेत्रय् न्ह्यागु छगू याःसां ल्हाः खालि मजुइकथं पारिश्रमिक वः तर झीगु थःगु हे ख्यलय् धाःसा आपाः धयाथें ल्हाः खालि जुइमालिगुलिं भचा चित्त दुःख जू । तर थौंकन्हय् थज्याःगु स्थिति मदये धुंकल ।

थःम्ह यानागु दुःखया प्रतिफलकथं भचा भचा जूसां पारिश्रमिक वः ।’ रोजिनाया कथं थुगु ख्यःयात व्यावसायिक रुपं न्ह्याके फःसा जक थ्व हे ख्यलय् तिके जुया च्वनेफइ, मखुसा दछि निदँ कलकारिताय् वइ, लिपा तना वनेगु बाहेक मेगु विकल्प दइमखु । ‘नेपालभाषा कलाकारिता ख्यलय् इच्छा जक दयां मगाः, थुगु ख्यलय् बांलाक न्ह्याः वनेगु खःसा कलाकारिताया तालिम व कलाकारिता अध्ययन यानाः दुहां वःसा बांलाइ ।

पुलांगु धरातल ज्वनाः मखु न्हूगु सोच ज्वनाः, न्हूगु पुस्ता कःघानाः न्ह्याः वने फःसा जक थुगु ख्यःय् भविष्य दइ’ वयागु बिचाः दु । नेपालभाषाया संकिपा स्वःवःपिं मदु, खालि च्यारिटि शो जक क्यनेमाला च्वंगु दु र स्वकुमित अप्वयेकेगु निंतिं छु यायेमालि धयागु खँय् वया बिचाः थुकथं दु, ‘प्याखंया कथावस्तु बांलाके फतधाःसा स्वकुमित अथें वइ, गथे नेपालभाषाया सिलु, राजमति अथे हे नेपाली व हिन्दी प्याखं स्वयेत वः थें वइ ।

मुख्य खँ प्याखंया कथावस्तुयात बांलाकेमाः । प्रोडक्ट बांलाःसा बजाः अथें दइ ।’रोजिनायात थःम्हं म्हितागु संकिपा ‘ग्यानपुस्टाइल’ व म्युजिक भिडियोय् ‘ट्याक्सी ड्राइभर’ व ‘जिगु वैंशं धाल’ दकलय् यः । कलाकार जुयाः दकलय् ल्वःमंके मफइगु घटना धाःसा रोजिनायात सुरु सुरुइ कलेज ब्वनाच्वंगु इलय् नेपाली भाय्या म्यूजिक भिडियो सुटिङया झ्वलय् बेनिघाट वनाः सुटिङ याः वनेमाःगु तर थः गबलें नं पिने मवनाम्ह जूगुलिं भचा ज्या मछिन ।

छेँय् बहनी याकनं वये धकाः वनागु तर सुटिङ सिमधयाः थौं सुथय् वनाम्ह कन्हय् सुथय् ५ बजे जक छेँय् थ्यंबलय् मामं ब्वः बियाः निन्हु स्वन्हु तक न्व हे मतूगु घटना धाःसा थम्हं ल्वमंके मफइगु कथं कायेगु याः ।रोजिनां थौंकन्हय् म्यूजिक भिडियो, चिहाकःगु संकिपाया सुटिङ व्यस्त जुयाच्वंगु दुसा न्हूगु संकिया स्क्रिप्ट ब्वनेगुलि नं व्यस्त जुयाच्वंगु दु ।