सिक्किमय् न्हापांगु भिंद्यः जात्रा

भारतया सिक्किम राज्यय् च्वंपिं नेवाःतय्सं थुगु दँनिसें भिंद्यः जात्रा नं शुरु याना हःगु दु। सिक्किमया नांजाःगु नगर नगर रंगलीइ च्वंगु भिंद्यःया देगलय् थ्व जात्रा न्यायेकूगु खः । स्वनिगःया यलय् गुकुन्हु भिंद्यःया जात्रा जुइगु खः सिक्किमय् नं वहे कुन्हु न्यायेकूगु खः । रंगलीया थ्व भिंद्यःया देगः थःहे ११७ दँ पुलांगु खः । तर नं अन जात्रा न्यायेकेगु
ज्या धाःसा थुगुसी तिनि याःगु खः ।

जात्रा स्वयेगु लागिं सिक्किमया थीथी थासं द्वलंद्वः मनूत रंगली वःगु खः । सुथय् सकस्यां भिंद्यः पुज्यात । प्रसाद नं ग्रहण यात । उगु पुजाय् सूर्यविर तुलाधर, रिम्पोचे अटुल शाक्य व श्री अलकार शाक्यपिंसं धार्मिक ज्या यानादीगु खः । पुजा आजा लिपा जात्रा शुरु जुल । भिंद्यःया देगलं शुरु जूगु उगु जात्रा रंगली बजारया आर्मी क्याम्प तक न्ह्याःगु खः ।

भिंद्यःयात व्यापार व्यवसायया द्यः कथं माने याइ । उकिं नं अनया थीथी लागाय् च्वंपिं बुराबुरि व मचा ल्याय् म्हतय्सं उतिकं श्रद्धा तयाः जात्राय् सहभागी जूगु खः ।

जात्राया नापनापं रंगलीया लाखे नं पिहां वःगु खः । न्ह्यःने न्ह्यःने प्याखं हुहुं वःम्ह थ्व लाखे स्वयेबलय् येँयाम्ह हे थें च्वंसा थ्व सिक्किमया बिस्कं लाखे खः । न्ह्यःने न्ह्यःने लाखे व लिउने भिंद्यःया खःक्वबियाः न्ह्याकूगु थ्व जात्रा सिक्किमया लागिं अतिकं उत्साहजनक जूगु खः ।

जात्राय् थीथी नेवाः गुथि, नेवाः शाखा व नेवाः संघ संस्थाया दुजःतय्सं नं ब्वति काःगु खः । जात्राय् सिक्किम सरकारया शहरी तथा आवास मन्त्री अरुण उप्रेति मू पाहां कथं झाःगु खः । अथे हे सिक्किम नेवाः गुथिया नायः दिलु मास्के लगायत मेपिं हनेबहःपिं नं पाहां कथं झाःगु खः ।

जात्रा क्वचायेकाः नेवाः पासा रंगलीया ग्वसालय् छगू सांस्कृतिक ज्याझ्वः नं अन जूगु खः । उकी रुद्र नरसिं शाक्यं नेवाः समाजय् भिंद्यःया महत्व बारे कनादीगु खः । अथे हे श्री भिमसेन महाराज मन्दिर संरक्षण समितिया नायः कुश नारायण प्रधानं भिंद्यःया कृपां सकले नेवाः व मुक्कं सिक्किमया हे उन्नति जुइगु आशा प्वंकादिल । लिसें वय्कलं सिक्किमय् थथे भिंद्यः जात्रा सम्पन्न जूगु उगु न्हियात सिक्किमी नेवाःतय् ऐतिहासिक न्हि जूगु बिचाः नं प्वंकादिल ।

सिक्किमय् वंगु छगू दशक न्ह्यवंनिसें कुमारीया रथ हे सालाः यँयाः पुन्हि न्यायेका वयाच्वंगु दुसा नेवाः भाय्, बाजं, लिपि, नसात्वँसा, प्याखं, भेषभूषाया प्रवर्द्धन यायेगु ज्या न्ह्याना वयाच्वंगु दु। थ्व झ्वलय् थुगुसी नेवाः समाजय् बिस्कं महत्व दुगु भिंद्यः जात्रा नं न्यायेकूगु खः ।