ने. सं. ११४६ चाैलागा आमै - माँया ख्वाःस्वयेगु

हानं संविधान संशोधनया माग

आदिवासी व मधेसी समुदायपाखें ब्ल्याक आउट

येँ – संविधान संशोधनया विकल्प मदु धासें यदि संविधान संशोधन मजुल धाःसा तःधंगु दुर्घटना जुइ फइगु ख्याच्वः समाजवादी पार्टीया अध्यक्ष डा. बाबुराम भट्टराईनं बियादीगु दु । म्हिगः बजेट अधिवेशनया लिपांगु संसदया बैठकय् न्ववायेगु झ्वलय् वय्कलं उगु ख्याच्वः बियादीगु खः ।

वय्कलं आःया संविधानय् आपालं त्रुटि दु धासें धयादी, ‘झीसं संविधान दयेकेगु झ्वलय् आपालं त्रुटि जूगु दु । झी चुके जूगु दु । झीसं गल्ति यानाच्वनागु दु । फुकस्यां स्वामित्व काये मफुत धाःसा जनताया असन्तुष्टि अप्वया वनाः तःधंगु दुर्घटना जुइफु ।’वय्कलं आःया मू मुद्दा हे संविधान संशोधन जूगु धासें पहिचान व राज्य पुनर्संरचनाया आधार बने मजूगुलिं यानाः थ्व मुद्दा गुगुं नं इलय् विष्फोट जुइफइगु ख्याच्वः नं बियादिल ।

मेखे सञ्चार तथा सूचना प्रविधि मन्त्री गोकुल बास्कोटां धाःसा सुयां रहर जुइवं संविधान संशोधन जुइ मफइगु खँ कनादीगु दु । म्हिगः सरकारया निर्णय सार्वजनिक यायेत ग्वसाः ग्वःगु पत्रकार सम्मेलनय् वय्कलं उगु खँ धयादीगु खः । वय्कलं संविधान संशोधन आवश्यकता व औचित्यया आधारय्जुइ धासें सुनानं लँय् न्यासि वनाच्वँच्वं छु म्हगस म्हंकल उकथं संविधान संशोधन जुइ मखु धयादिल ।

मेखे सत्तारुढ दल नेकपा संसदीय दलया उपनेता सुवास नेम्वाङं संविधानय् कमि कमजोरी दुसा उकियात कयाः संविधान भिंकेत तयार दुगु खँ धयादीगु दुु । वय्कलं संविधान दयेकाः ऐतिहासिक ज्या यानागु धासें गनं नं कमजोरी जूसा उकियात भिंकाः न्ह्याः वनेत थःपिं तयार दु धयादिल ।

उकथं हे राष्ट्रिय जनता पार्टीया अध्यक्ष राजेन्द्र महतों नेपालय् फुक्कं नेपाःमिपिंसं संविधान दिवस न्यायेकेगु अवस्था मवःगु खँ धयादीगु दु । वय्कलं म्हिगः संसदय् न्ववायेगु झ्वलय् उगु खँ धयादीगु खः । वय्कलं धयादी, ‘प्यदँ दत फुक्कं जनतां उत्साहपूर्वक संविधान दिवस हनेगु ह्वःताः चूलाःगु मदुनि, परिस्थित हे बने जूगु मदुनि ।

छु थःगु हे ल्हातं लापा थानाः तसकं बांलाःगु संविधान दयेका धकाः धायेगु ला ?’सरकारं म्हिगः, थौं व कन्हय् स्वन्हुयंकं झःझः धायेक संविधान दिवस हनेगु निर्णय याःगु दु । मेखे आदिवासी जनजाति, मधेसी लगायत मुस्लिम, अल्पसंख्यक, दलित समुदायं धाःसा थौंया न्हियात हाकुगु न्हिया रुपय् हनेगु तयारी याःगु दु । थ्व झ्वलय् थ्व समुदायं थौं देय्न्यंकं बहनी ७ निसें ७.३० बजे तक ब्ल्याक आउट यायेगु ज्याझ्वः दयेकूगु दु ।