प्रधानमन्त्री माग यासें सर्वोच्चय् देउवा

येँ – विपक्षी गठबन्धया १४६ म्ह सांसदतय्सं संसद पुनस्र्थापना यायेत व नेपाली कांग्रेसया सभापति शेरबहादुर देउवायात प्रधानमन्त्री नियुक्त यायेत माग यासें म्हिगः सर्वोच्च अदालतय् रिट दायर याःगु दु ।

वंगु शुक्रवाः चान्हय् राष्ट्रपति विद्यादेवी भण्डारीं सरकार गठनया लागिं शेरबहादुर देउवां यानादीगु दावीयात खारेज यासें संसद भंगया नापनापं आः वइगु कार्तिक २६ व मंसिर २ गते मध्यावधि निर्वाचनया घोषणा यानादीगु खः ।

रिट दर्ता यायेगु लागिं प्रतिनिधिसभाया बहुमत खाकाः १४६ म्हं हे सांसदत सर्वोच्च अदालतय् उपस्थित जूवंगु खः । अदालतया न्ह्यःने थःपिंके बहुमत दु धकाः क्यनेगु लागिं १४६ म्ह सांसदत सकलें झ्वःलिं दनाः सर्वोच्चय् हे रिटय् हस्ताक्षर याःगु खः ।

सर्वोच्च अदालतय् सशरीर दनाः थःगु उपस्थिति क्यं वःपिं थ्व सकलें सांसदतय्गु अभिलेख तयेगु लागिं सर्वोच्च अदालतं उमिगु फोटो समेत खिचे यानाः तःगु खः । सर्वोच्च अदालतया आधिकारिक क्यामेरा म्यान पिहां वयाः सांसदत झ्वःलिं दनाच्वंगु फोटो खिचे यानादीगु खः । सर्वोच्च अदालतय् रिट तयेगु लागिं संसदया बहुमत सांसदत थथे उपस्थित जूवंगु थ्वहे न्हापांखुसी खः ।

सर्वोच्चय् रिट तःपिं थ्वहे सांसदतय्सं वंगु शुक्रवाः राष्ट्रपति समक्ष संविधानया धारा ७६ (५) कथं कांग्रेसया सांसद शेरबहादुर देउवाया नेतृत्वय् सरकार गठनया लागिं हस्ताक्षर सहित दावी पेश याःगु खः ।

प्रष्ट बहुमत सहित दाबी पेश याःम्ह देउवायात राष्ट्रपतिं प्रधानमन्त्री निय्ुक्त मयाःगु असंवैधानिक जूगु धासें म्हिगः रिट तःगु खः । रिटय् जिकिर यानातःगु दु, ‘संसदय् बहुमत क्यने मफुत धकाः वैकल्पिक सरकार गठनया निंतिं इनाप याःम्ह प्रधानमन्त्री केपी शर्मा ओलीयाके हाकनं प्रधानमन्त्रीया दाबी यायेगु हक मदु ।’

रिटय् प्रतिनिधिसभा विघटन असंवैधानिक जूगुलिं उकियात खारेज यायेगु लिसें देउवाया दाबी वैधानिक जूगुलिं वय्कःयात प्रधानमन्त्री नियुक्त यायेत परमादेश जारी यायेमाःगु माग नं यानातःगु दु ।

सम्बन्धित बुखँ

LEAVE YOUR COMMENTS